80-ամյա ամերիկուհի գրողը և նրա ամուսինը այն մի քանի մարդկանց թվում են, որոնք Ֆրանսիայում կարող են դատվել 18-րդ դարի նավաբեկությունից գողացված ոսկու ձուլակտորների անօրինական վաճառքի համար, հաղորդում է CBS News-ը։

Էլեոնոր «Գեյ» Քորթերը և նրա 82-ամյա ամուսինը՝ Ֆիլիպը, մեղադրվում են ֆրանսիացի ջրասուզորդին ձուլակտորները համացանցում վաճառելուն օգնելու մեջ։

Ասիայի հետ առևտուր անող ֆրանսիական «Արքայազն դը Կոնտի» նավը խորտակվել է Բրետանի ափերի մոտ 1746 թվականի ձմռանը։ Դրա բեկորները հայտնաբերվել են 1974 թվականին Բել-Իլ-ան-Մեր կղզու մոտ։ Խորտակված նավը թալանվել է 1975 թվականին։

Նավից թալանված ոսկե ձուլակտորների մի մասը հայտնվել է Սան Ֆրանցիսկոյի աճուրդում։ 2018 թվականին Ֆրանսիայի ստորջրյա հնագիտության բաժնի ղեկավար Միշել Լուրը նկատել է հինգ ոսկե ձուլակտորների կասկածելի վաճառք ամերիկյան աճուրդի տան կայքում։ Գանձերը առգրավվել են և 2022 թվականին վերադարձվել Ֆրանսիա։

Հետաքննիչները պարզել են, որ վաճառողը Ֆլորիդայում բնակվող կին գրող և կինոպրոդյուսեր Էլեոնոր «Գեյ» Քորթերն է։ Վերջինս պատմել է, որ թանկարժեք մետաղն իրեն նվիրել են ֆրանսիացի երկու ընկերուհիներ՝ Անետ Մեյ Պեստին և նրա այժմ արդեն հանգուցյալ զուգընկեր Ժերարը։

1999 թվականին Պեստին «Antiques Roadshow» հեռուստասերիալին պատմել է, որ Արևմտյան Աֆրիկայի Կաբո Վերդե կղզու մոտ սուզվելիս ոսկի է հայտնաբերել։ Սակայն հետաքննողները դա անհավանական են համարել և կենտրոնացել նրա աներորդու՝ 77-ամյա ստորջրյա լուսանկարիչ Իվե Գլեդուի վրա:

1983 թվականին դատարանը հինգ մարդու մեղավոր էր ճանաչել «Արքայազն դը Կոնտի» նավի թալանին առնչվող յուրացման և գողոնը ստանալու մեջ։ Գլեդուն նրանց մեջ չէր։ 2022 թվականին կալանքի տակ գտնվելու ընթացքում նա խոստովանել է, որ 1976-1999 թվականներին նավից հանել է ոսկու 16 ձուլակտոր՝ տեղում սուզումների ժամանակ։ Նա պատմել է, որ դրանք բոլորը 2006 թվականին վաճառել է Շվեյցարիայում բնակվող թոշակառու զինվորականի։

Սակայն նա հերքել է, որ դրանք երբևէ տվել է իր ամերիկացի ընկերներին՝ Քորթերներին։ Հետաքննիչները պարզել են, որ նա ճանաչել է հեղինակին և նրա ամուսնուն 1980-ական թվականներից ի վեր։ Քորթերները ձերբակալվել են Մեծ Բրիտանիայում 2022 թվականին և տնային կալանքի տակ են գտնվել։ Ֆրանսիացի հետաքննողները եզրակացրել են, որ ընդհանուր առմամբ իրենց մոտ կար առնվազն 23 ոսկե ձուլակտոր։ Զույգը վաճառել է 18 ձուլակտոր ավելի քան 192 հազար ԱՄՆ դոլարով։