ՆախընտրելիՀամաձայն վիճակագրության` երեխաների թրաֆիքինգը Հայաստանում տարածված չէ, սակայն արձանագրված դեպքերը անհանգստացնող են եւ պահանջում են հետեւողական գործողություններ կանխարգելման ուղղությամբ: Այդ մասին նշված է ՄԱԿ-ի Երեխայի իրավունքների մասին կոնվենցիային կից «Մանկավաճառության, երեխաների մարմնավաճառության եւ մանկական պոռնոգրաֆիայի մասին» կամընտիր արձանագրության կատարման վերաբերյալ Հայաստանի Հանրապետության սկզբնական զեկույցում:
Զեկույցը նախապատրաստվել է միջգերատեսչական աշխատանքային խմբի կողմից: Շահագրգիռ հասարակական կազմակերպությունները հնարավորություն են ունեցել ներկայացնելու առաջարկներ զեկույցի կառուցվածքի եւ բովանդակության վերաբերյալ:
Ըստ զեկույցում ներկայացված տեղեկատվության`2005-2010 թվականներին մարմնավաճառությունից տուժել են 5 անչափահասներ, ընդ որում`այդ դեպքերը տեղի են ունեցել 2009 եւ 2010 թվականներին: Ներկայումս անչափահաս մարմնավաճառներ ոստիկանության հաշվառումներով չեն անցնում:
Հանրապետությունից դուրս երեխաներին անօրինական տանելու կամ առեւանգման դեպքեր չեն արձանագրվել: Սակայն «մանկավաճառություն» հոդվածով մի շարք քրեական գործեր տեղի են ունեցել: Մասնավորապես` 2008 թ. այդպիսի 9 դեպք է եղել, իսկ 2010 թ.`1-ը:
