Նախընտրելի
Toyota ավտոարտադրողը պաշտոնապես Century անվանումը մոդելից վերածել է ինքնուրույն ուլտրաշքեղ ապրանքանիշի, հաղորդում է Motorious-ը։
Սա նշանակում է, որ Century-ն այժմ կգերազանցի Lexus-ին և համաշխարհային մասշտաբով կմրցակցի այնպիսի խորհրդանիշների հետ, ինչպիսիք են Rolls-Royce-ը և Bentley-ն։
Century ապրանքանիշն ունի ավելի քան 50 տարվա պատմություն. 1967 թվականից ի վեր այս մոդելը Ճապոնիայում կարգավիճակի խորհրդանիշ է եղել, որն ընտրել են բարձրաստիճան պաշտոնյաները, կորպորատիվ ղեկավարները և վերնախավի ներկայացուցիչները։
Այժմ Century-ն համաշխարհային ճանաչում է ձեռք բերում. ապրանքանիշի նոր փիլիսոփայությունը կենտրոնանում է անհատականության, բացառիկության և One of One սկզբունքի վրա. յուրաքանչյուր մեքենա հավաքվում է ձեռքով՝ նյութերի, զարդարանքի և գույնի ամբողջական անհատականացման հնարավորությամբ։
Շնորհանդեսի շրջանակում ներկայացվեց Century-ի One of One կուպեի կոնցեպտը, որը ցուցադրում էր արմատական դիզայնի փոփոխություններ. երկար կապոտ, ռադիատորի զանգվածեղ ցանց, սահող դռներ և սրահի մտածված ինտերիեր՝ հատուկ ուշադրությամբ հետևի նստատեղին, որտեղ ուղևորներն առավելագույն հարմարավետություն կզգան։
Տեխնիկական բնութագրերը դեռևս լիովին չեն բացահայտվել. Toyota-ն նախատեսում է հիբրիդային, բենզինային և էլեկտրական տարբերակներ, և մեկնարկային գինը, ըստ կանխատեսումների, Ճապոնիայում կգերազանցի 30 միլիոն իենը (մոտավորապես 200 հազար դոլար): Արտադրությունը խստորեն կսահմանափակվի փոքր քանակով՝ ապրանքանիշի բացառիկությունը պահպանելու համար։
Century ապրանքանիշն աստիճանաբար կընդլայնվի համաշխարհային շուկաներում, ներառյալ Չինաստանը, Մերձավոր Արևելքը և, հնարավոր է, Միացյալ Նահանգները: Նոր ապրանքանիշը ցույց է տալիս, որ Toyota-ն պատրաստ է դուրս գալու զանգվածային շուկայի և պրեմիում հատվածներից՝ ստեղծելով գերլյուքս մեքենաներ, որոնք կարող են մրցակցել համաշխարհային էլիտայի լավագույն ներկայացուցիչների հետ:
