նախընտրելի դարձնել
Եթե Եվրամիությունը որոշի Ռուսաստանի սառեցված ակտիվներն ուղղել Ուկրաինային տրամադրվող «ռեպարացիոն վարկին», ապա Մոսկվան դա կարող է դիտարկել որպես պատերազմ հայտարարելու օրինական հիմք, հայտարարել է ՌԴ Անվտանգության խորհրդի փոխնախագահ Դմիտրի Մեդվեդևը։ «Այդ դեպքում այդ միջոցների վերադարձը կարող է տեղի ունենալ արդեն ոչ թե դատարանով, այլ բնական ձևով վճարված իրական ռեպարացիաներով՝ ի կատար ածված Ռուսաստանի կողմից ջախջախված թշնամիների կողմից», – գրել է Մեդվեդևը Telegram-ի իր ալիքում։ Մինչ այդ նա բազմիցս պատերազմով էր սպառնացել Եվրոպային և ԱՄՆ-ին, այդ թվում՝ միջուկայինով, բայց ընդգծել էր, որ Մոսկվան մտադիր չէ առաջինը հարձակվել արևմտյան երկրների վրա։
Մեդվեդևը հերթական սպառնալիքով հանդես է եկել այն բանից հետո, երբ Եվրահանձնաժողովը նախապատրաստել է Ուկրաինային «ռեպարացիոն վարկ» տրամադրելու պլան, որի մեջ ներառվել են ԵՄ երկրներում սառեցված ռուսական ակտիվները։ Պլանը նախատեսում է Կիևին մինչև 210 միլիարդ եվրո տրամադրել, որից 140 միլիարդը կհանվի Ռուսաստանի Կենտրոնական բանկի՝ բելգիական Euroclear դեպոզիտարիայում գտնվող հաշվից։ Ընդ որում, 115 միլիարդ եվրոն ենթադրվում է ուղղել Ուկրաինայի պաշտպանական արդյունաբերության ֆինանսավորմանը, իսկ մնացած 95 միլիարդ եվրոյից Կիևը կմարի 45 միլիարդ եվրոն, որը G7-ի երկրները նախկինում տրամադրել էին ռուսական ակտիվների ապագա եկամուտների գրավադրմամբ։ Եվս 50 միլիարդ եվրո կարող է օգտագործվել բյուջետային կարիքների համար։
Ռեպարացիոն վարկ տրամադրելու համար կպահանջվի «ձայների որակյալ մեծամասնություն», նշել են Եվրահանձնաժողովում։ Սա կօգնի շրջանցել ԵՄ անդամ առանձին երկրների վետոն, որոնք համաձայն չեն լինի որոշման հետ։ Հանձնաժողովը նաև առաջարկել է «ժամանակավոր հիմունքներով» արգելել Ռուսաստանի սառեցված միջոցների վերադարձը և ԵՄ ներսում օտարերկրյա դատարանների որոշումների կատարումը՝ որպես Մոսկվայի պատասխան միջոցառումների շրջանակ։ Բրյուսելում նման քայլերը հիմնավորել են ԵՄ պայմանագրերի այն դրույթներով, որոնք վերաբերում են արտակարգ միջոցներին, որոնք պահանջվում են ի պատասխան «Ուկրաինայում պատերազմի համատեքստում Ռուսաստանի գործողություններով պայմանավորված տնտեսական դժվարություններին»։
Բելգիայի վարչապետ Բարտ դե Վևերը դեմ է արտահայտվել ռուսական ակտիվների բռնագրավմանը։ «Դա հիանալի պատմություն կլիներ՝ չարագործ Պուտինից գումարները խլելու և դրանք բարի Ուկրաինային տալու համար։ Բայց մեկ այլ երկրի սառեցված ակտիվները, նրա սուվերեն հիմնադրամները գողանալը, դա դեռ երբեք չի արվել։ Խոսքը Ռուսաստանի Կենտրոնական բանկի գումարների մասին է», - նշել է դե Վևերը։
Նա հիշեցրել է, որ Մոսկվան ի պատասխան սպառնացել է բռնագրավել արևմտյան ակտիվներն իր տարածքում։ Ընդ որում, միայն Euroclear-ի 16 միլիարդ եվրոն է «կախված» մնացել երկրում։ Ռուսաստանի օրինակին կարող են հետևել նաև այլ երկրներ, այդ թվում՝ Չինաստանը, իսկ ԵՄ-ում միայն Գերմանիան է պատրաստ բաժանել հնարավոր ռիսկերը Բելգիայի հետ, ընդգծել է դե Վևերը։ Իր հերթին, ԱՄՆ-ը ԵՄ-ին հասկացրել է, որ պատրաստվում է վերադարձնել Ռուսաստանի սառեցված ակտիվները Ուկրաինայի շուրջ խաղաղության համաձայնագիրը ստորագրելուց հետո։
