Իրանի արտաքին գործերի նախարարության խոսնակ Էսմայիլ Բաղային Իսրայելին և Միացյալ Նահանգներին մեղադրել է, հայտարարելով, որ նրանք ավելի քան 20 տարի «վախեցրել են» աշխարհին՝ իրանական միջուկային ծրագրի վերաբերյալ հայտարարություններով, հայտնում է ԻՌՆԱ-ն:

Ըստ Բաղայիի՝ թեև Թեհրանը պատրաստվում է բանակցությունների, «երկիրը պետք է լիովին պատրաստ լինի ցանկացած սցենարի»։

Նա նաև հերքել է Իրանի միջուկային գործունեության վերաբերյալ մտահոգությունները՝ հայտարարելով, որ դրանք իրական հիմք չունեն։

«Չնայած անցյալ տարվա հունիսին տեղի ունեցած 12-օրյա պատերազմին՝ որոշում է ընդունվել ներգրավվել բանակցային գործընթացում, և վերջին փուլում համաձայնություն է ձեռք բերվել նախնական ըմբռնման որոշ հիմնական պարամետրերի շուրջ՝ նրանց տեսանկյունից մտահոգությունները վերացնելու, իսկ մեր տեսանկյունից՝ Իրանի միջուկային իրավունքները երաշխավորելու համար»,- ասել է Բաղային։