նախընտրելի դարձնելՌուսաստանը մարել է Ղրղըզստանի ռազմական օբյեկտներն օգտագործելու դիմաց ունեցած պարտքը: Այդ մասին ասվում է Ղրղըզստանի պաշտպանության նախարարության հաղորդագրության մեջ: Ըստ հաղորդագրության` Ռուսաստանը մարտի 1-ին փոխանցել է 15,5 միլիոն դոլարի հասնող գումար:
Առաջին անգամ Ղրղըզստանի ռազմական օբյեկտները վարձակալելու դիմաց Ռուսաստանի ունեցած պարտքի մասին հարցը բարձրացրել է երկրի նախագահ Ալմազբեկ Ատամբաեւը 2011 թվականի վերջին:
Փետրվարի վերջին գտնվելով Մոսկվայում` Ատամբաեւը կրկին հայտարարել էր, որ Ռուսաստանն արդեն չորս տարի է չի վճարում «Կանտ» ավիակայանի վարձակալման գումարը: Ավելի վաղ Ղրղըզստանի իշխանությունները հայտարարել էին, որ պարտքը վերաբերում է նաեւ երեք այլ օբյեկտներին` զորահարթակին, սեյսմիկ կայանին եւ կապի հանգույցին, իսկ «Կանտն» օգտագործվել է ՀԱՊԿ-ի շրջանակներում առանց փոխհատուցման: Հետագայում ղրղըզական իշխանություններն ընդունել են, որ հանրապետության նախագահը սխալ է թույլ տվել, հայտնում է REGIONS.RU-ն:
Այն բանից հետո, երբ Ատամբաեւը հայտարարել էր Ռուսաստանի պարտքի մասին, Կրեմլի մամուլի ծառայությունում հիշեցրել են, որ Ղրղըզստանն էլ Ռուսաստանին շուրջ 500 միլիոն դոլար է պարտք:
