Apple ընկերությունը պահանջում է ԱՄՆ-ի շուկայում արգելք սահմանել Samsung-ի սմարթֆոնների ութ մոդելների վաճառքի վրա։
Հիշեցնենք, անցնող շաբաթվա վերջին ատենակալների դատարանը Samsung-ին մեղավոր էր ճանաչել սմարթֆոնների մոդելներում Apple-ի պատենտավորած տեխնոլոգիաներ կիրառելու մեջ։ Ատենակալները Apple-ի կորուստները գնահատել էին 1,05 մլրդ դոլար։ Samsung-ի պատասխան հայցերը չէին բավարարվել։
Դատարանի որոշումից հետո Apple-ը պահանջել էր ամերիկյան շուկայում արգելել Galaxy S 4G եւ Galaxy S Showcase, Galaxy S2 սմարթֆոնների վաճառքը, որոնք վաճառվել էին AT&T, Skyrocket եւ T-Mobile կապի օպերատորներին, ինչպես նաեւ Galaxy S2 Epic 4G, Droid Charge եւ Galaxy Prevail մոդելները: Պահանջում նշված են 28 մոդելներից 8-ը, հայտնում է «ՌԻԱ Նովոստին»:
Տվյալ պահին Apple-ը ժամանակավոր արգելք է պահանջում վաճառքի համար՝ մինչեւ դատարանի վերջնական վճիռը: Apple-ը հուսով է ամերիկյան շուկայում հասնել թվարկված Samsung սմարթֆոնների վաճառքի լիակատար ագելքի:
Samsung Galaxy S3 սմարթֆոնը պահանջում չի նշվել: Պահանջում չեն նշվել նաեւ Samsung Galaxy Tab պլանշետային համակարգիչները: Հիշեցնենք, որ ատենակալների դատարանը մերժել էր Apple-ի հայցը Galaxy Tab 10.1-ում iPad պլանշետային համակարգչի դիզայնի պատենտի խախտման վերաբերյալ: