Լոռու մարզում շրջված զինվորական բեռնատարով զինծառայողները վերադառնում էր Արմավիրից: NEWS.am-ի տեղեկություններով՝ Վանաձորում ծառայող զինվորները գնացել էին Արմավիրի մարզի ուսումնական կենտրոն զորավարժությունների, զորամաս վերադառնալու ճանապարհին էլ եղավ դեպքը: Բեռնատարը շրջվել է Սպիտակի ոլորանների վրա եւ ընկել ձորը, մահացող զինծառայողը, ով պետք է զորացրվեր աշնանը, հենց վարորդն է:
Վթարի հետեւանքով վիրավորվել էր 9 զինծառայող, նրանց բոլորին երեկոյան եւ գիշերը Սպիտակի հիվանդանոցից տեղափոխել են Երեւան՝ Կենտրոնական կայազորային հոսպիտալ: Սպիտակի հիվանդանոցից NEWS.am-ի թղթակցին հայտնեցին, որ վիրավորներից երեքի վիճակը ծանր էր, մեկին վիրահատել են, հետո տեղափոխել Երեւան:
Կենտրոնական կայազորային հոսպիտալի պետ Արամ Ասատրյանը NEWS.am-ի թղթակցի հետ զրույցում ասաց, որ զինծառայողներից երկուսի վիճակը ծանր է, մնացածինը՝ բավարար: Երեք զինծառայող գտնվում է Վերակենդանացման բաժանմունքում, մյուսները՝ բաժանմունքներում: Առայժմ հոսպիտալում որեւէ զինծառայողի չեն վիրահատել, այսօր պատրաստվում են մեկին վիրահատել, մյուսին էլ կվիրահատեն առաջիկայում: Արամ Ասատուրյանը նշեց, որ մի շարք վիրահատություններ պետք է արվի՝ կոնքի, ուսապարկի, կույր աղիքի:
Մեր տեղեկություններով՝ դեպքի առթիվ կհարուցվի քրեական գործ: Համապատասխան փորձաքննություննրից հետո կպարզվի, թե ինչն էր վթարի պատճառը, արդյոք վարորդն էր մեղավոր, թե մեքենան տեխնիկապես սարքին չի եղել:
Հիշեցնենք, որ ապրիլի 17-ին, ժամը 17.00-ի սահմաններում, ժամկետային զինծառայողներին տեղափոխող N զորամասին պատկանող «Ուրալ» մակնիշի ավտոմեքենան Սպիտակ-Երեւան ավտոճանապարհի 19-րդ կիլոմետրին դուրս է եկել երթեւեկելի հատվածից եւ շրջվել հարակից ձորակը: Ավտոմեքենայի թափքում գտնվող զինծառայողները տարբեր աստիճանի մարմնական վնասվածքներով տեղափոխվել են Սպիտակ քաղաքի հիվանդանոց:
ՊՆ մամուլի ծառայությունից հայտնում են, թե երեք վիրավոր զինծառայող Սպիտակի հիվանդանոցում ստանալով առաջին բուժօգնություն` տեղափոխվել են Կենտրոնական կլինիկական զինվորական հոսպիտալ: Դեպքի մանրամասները ճշտվում են:
Վթարի հետեւանքով ստացած վնասվածքներից մահացել է ժամկետային զինծառայող Արտյոմ Գերասի Թորոսյանը (ծնված 1995թ., Սիսիանի զ/կ, 2013թ. 2-րդ զորակոչ):
