Ծննդատանը կնոջը հրազենային ծանր վնասվածք հասցրած եւ ինքնասպան եղած տղամարդը մոտ 5-6 ամիս է՝ կնոջ հետ վարձով բնակվում էր Դավթաշեն վարչական շրջանի 1-ին թաղամասի շենքերից մեկում: NEWS.am-ի թղթակիցը այցելել է նրանց բնակության վայր եւ զրուցել հարեւանների հետ:
Վերջիններս շատ բան չգիտեին ամուսինների մասին, քանի որ առանձնապես շփում չունեին հարեւանների հետ: «Առավոտ շուտ տեսանք՝ սկեսուրը վազելով գնում էր, էլ չհասցրինք էլ կանչենք, իմանանք՝ ինչ է եղել: Մի ոսկի կին է, համեստության տիպար, կյանքում ձենը լսած չկանք, հաճելի անձնավորություն է, թաղապետարանում է աշխատում՝ որպես հաշվապահ»,-մեզ հետ զրույցում պատմեցին հարեւանները:
Երիտասարդ ամուսինները ապրում էին սկեսուրի հետ, հուլիսից արդեն պետք է տեղափոխվեին Դավթաշենի նորակառույց շենքերից մեկում գնած իրենց բնակարանը, որը վերանորոգման մեջ էր: «Հաշտ, համերաշխ ամուսիններ էին, իրար հետ կհելնեին, ման կգային, մի հատ էլ սիրուն, փոքր շուն ունեին, կգնային, կգային, այգում շատ կտեսնեինք: Շատ լավ աղջիկ էր, ասող, խոսող, շփվող, անմիջական, վատ բան չենք տեսել իրենցից, ձենները դուրս չի եկել, տենց շատ չէին շփվում, բայց տեսած տեղը նորմալ բարեւ, բարլուս կար: Ամուսինն էլ նորմալ մարդու տպավորություն է թողել, ոչ մի տարօրինակ բան տեսած չկանք»,-ասում էին հարեւանները:
Նրանք պատմեցին նաեւ, որ հարսը Օդեսայում էր ապրում, ամուսնացել էր եւ եկել Հայաստան: 2 տարի երեխա չէին ունենում, անհամբեր սպասում էին առաջնեկի ծնվելուն եւ պատրաստվում այդ կարեւոր առիթին: «Աղջիկը մայր, հայր,եղբայր ունի, կարծեմ էստեղ էլ առանձնատուն ունեն, մայրը եկել էր Օդեսայից, Միլենան պատմում էր, որ մայրը ամեն ինչ գնել է թոռան ծնվելու առթիվ, պատրաստվել են: Եսիմ, ապշած ենք, ախր ջան, ջիգյարով ամուսիններ էին երեւում, վատ բան չենք տեսել իրենցից, տեղը տեղին էլ ապրում էին, էնպես չի, որ ասես սոցիալական խնդիրներ ունեին, աբսուրդ է նաեւ, թե իբր երեխան իրենից չի եղել, հոգեկան խնդիրներ էլ մենք տենց բաներ չենք տեսել»,-պատմեցին հարեւանները:
Ավելի վաղ NEWS.am-ը հայտնել էր, որ Երեւանի Պերինատոլոգիայի, մանկաբարձության եւ գինեկոլոգիայի կենտրոնում հունիսի 30-ին արտակարգ դեպք է գրանցվել: Ամուսինը եկել էր հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել:
Մեզ հաջողվեց պարզել, որ նրանք ապրում են Դավիթաշենում, կինը՝ 27-ամյա Միլենա Ա.-ն ծննդաբերել է 8 ամսականում: Ամուսինը՝ 33-ամյա Հայկ Վ.-ն գալով հիվանդանոց տեսել էր զոքանչին եւ հարազատներին այնտեղ, ապա նրանց ուղարկել էր բուլկի գնելու եւ կրակել կնոջ պարանոցին: Ամուսինը տեղում մահացել էր, կնոջը վիրահատել են, վիճակը ծայրահեղ ծանր է, լույս աշխարհ եկած բալիկը լավ է:
