ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կրակոցից նոյեմբերի 12-ին զոհված ժամկետային զինծառայող 19-ամյա Միքայել Թորոսյանը Երեւանի բնակիչ է, 10 ամիս առաջ էր զորակոչվել բանակ: Այս մասին NEWS.am-ին ասաց Թորոսյանների հարեւաններից մեկը:
«Փոքր ժամանակվանից ճանաչում ենք, զուսպ, խելացի, խելոք տղա էր: Լավ առաջադիմությամբ ավարտել էր քոլեջը, մասնագիտությամբ տնտեսագետ էր»,- ասաց հարեւանը:
Միքայել Թորոսյանը արհեստավորի ընտանքից է, ընտանիքի կրտսեր զավակը, մեկ քույր ունի:
Ավելի վաղ NEWS.am-ը հայտնել էր, որ նոյեմբերի 12-ին` ժամը 21:00-ի սահմանում, ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված կրակոցներից մահացու հրազենային վիրավորում են ստացել զինծառայողներ Վահե Վարդգեսի Վանոյանը (ծնվ. 1995թ.) եւ Միքայել Առաքելի Թորոսյանը (ծնվ. 1996թ.):
Դեպքի մանրամասները պարզելու համար կատարվում է քննություն:
