Ոստիկանությունն այս պահին ուժեր է կենտրոնացնում Ազատության հրապարակի մուտքի մոտ՝ Մաշտոցի պողոտայի կողմից:
NEWS.am-ի թղթակիցը հաղորդում է, որ մի քանի տասնյակ կարմիրբերետավորներ զինվում են հատուկ միջոցներով, մահակներով, բաճկոններով, սաղավարտներով եւ վահաններով:
Ոստիկանները հսկում են Ազատության հրապարակի բոլոր մուտքերը:
Ոստիկանությունը մեծ ուժեր է կենտրոնացրել նաեւ Կենտրոնական ընտրական հանձնաժողովի մոտ: Այնտեղ մի քանի ավտոբուսներ են կանգնած, որոնց մեջ տասնյակ իրավապահներ են նստած:
Երեւանի փոխոստիկանապետ Վալերի Օսիպյանը, որն այժմ Ազատության հրապարակում է, NEWS.am–ի հետ զրույցում ասաց, որ հսկողությունն ուժեղացվել է միայն հասարակական կարգը պահպանելու համար։
Հարցին, թե ինչու են զինվում իրավապահները, Օսիպյանն ասաաց, որ նրանք ընդամենը զինված են ռետինե մահակներով, ինչպես ամեն օր, եւ այդ առնչությամբ անհանգստանալու առիթ չկա։
Հիշեցնենք, որ այսօր՝ դեկտեմբերի 6-ին, ժամը 20:00-ից սահմանադրական փոփոխությունների դեմ պայքարող «Նոր Հայաստան» փրկության ճակատը վճռական հանրահավաք է է հրավիրել: