Թալիշում զոհված Վրեժ Սարգսյանի որդին` երկու տարեկան Վարդանը, այլեւս չի տեսնի հորը:
Վրեժի կինը` Նախշուն Մելիքյանը, պատմել է, որ նա շատ է սիրել որդուն, նրա հետ շատ լրջորեն է խոսել, ինչպես մեծահասակի հետ: «Բոլորին ասում էր, որ իր որդին պետք է քաջ եւ անվախ լինի: Միշտ պատրաստ էր կյանքը տալ հանուն հայրենիքի: Իսկ մի անգամ փոքրիկ Վարդանը վերցրել է ափսեն եւ գդալը, մոտեցել է հոր դիմանկարին եւ ասել. «Կե՛ր, հայրի՛կ, կե՛ր», - հազիվ զսպելով արցունքները` պատմում է Նախշունը:
«Տղան շատ է կարոտում հորը,- ասում է կրտսեր սերժանտի երիտասարդ այրին,- նա անընդհատ մոտենում է դիմանկարին եւ լուռ նայում է»: Վերջին անգամ տղան հորը տեսել է մարտի 15-ին: «Վրեժն ուզում էր, որ իր որդին բռնցքամարտիկ դառնա, ուժեղ լինի եւ ոչ մեկից չվախենա: Մենք ուզում էինք առանձին բնակարան գնել: Նա ուզում էր դրա համար փող կուտակել», - չիրականացած երազանքներն է պատմել Նախշունը: Ներկայումս Վրեժ Սարգսյանի ընտանիքն ապրում է Փոքր Մասրիկ գյուղում Վարդենիս քաղաքից ոչ հեռու:
Կրտսեր սերժանտ Վրեժ Սարգսյանը ԶՈւ-ում ծառայում էր 2013 թվականից: Զոհվել է Թալիշում ապրիլի 4-ին: