Ազատության հրապարակից մեկնարկել է երթ դեպի Խորենացի փողոց՝ աջակցություն հայտնելու «Սասնա ծռեր» խմբի:
NEWS.am-ի թղթակցի փոխանցմամբ, «Հակաճգնաժամային նախաձեռնող խորհրդի» անդամ Ալբերտ Բաղդասարյանը դիմեց ժողովրդին՝ երթ անել քաղաքի կենտրոնով, թե գնալ Խորենացի փողոց: «Խորենացի, Խորենացի» սկսեցին վանկարկել բազմության միջից, մի քանի երիտասարդներ էլ բարձրացան բեմ՝ պահանջելով ելույթի իրավունք: Առանձին տեւական քննարկումներից հետո Ալբերտ Բաղդասարյանը ձայն տվեց նշված երիտասարդին, վերջինս չներկայացավ, սակայն ելույթ ունեցավ, կոչ արեց երթ անել Երեւանի փոքր կենտրոնով:
Ի վերջո, Ալբերտ Բաղդասարյանը հայտարարեց, որ երթ են անում դեպի Հանրապետության հրապարակ, այնտեղ էլ կորոշեն, թե որ ճանապարհով են շարժվելու: «Երթն անցնելու է Մաշտոցի պողոտայով, Ամիրյան փողոցով դեպի հրապարակ, այդ ընթացքում կորոշենք ինչ անենք»,- ասաց Բաղդասարյանը:
Նշենք, որ ոստիկանությունը երեկ՝ հուլիսի 29-ին ուժ կիրառեց Սարի թաղում եւ խորենացի փողոցում հավաքված ցուցարարների նկատմամբ: 165 մարդ բերման է ենթարկել, 73 անձ տեղափոխվել է հիվանդանոց: Ոստիկանական գործողություններից տուժել են նաեւ մեկ տասնյակ լրագրողներ: Քաղաքացիական հագուստով ոստիկանները կոտրել եւ խլել են NEWS.am-ի տեսախցիկը:
