Ապագան դեռ առջեւում է, սակայն դա չի խանգարում բոտերին արդեն հիմա բարդացնել մարդկանց կյանքը: Այս մասին գրում է The Guardian-ը: Պարբերականի կանխատեսմամբ, ընդամենը հինգ տարի հետո Արհեստական Բանականությամբ օժտված ամենահայտնի հավելվածները կլինեն չաթբոտերն ու վիրտուալ օգնականները:
Չնայած ֆինտեխնոլոգիաների զարգացմանը եւ բոտերին, որոնք արդեն այսօր ֆինանսական գործարքներ են իրականացնում՝ ֆինասական կոնսուլտանտների դեր կատարելով՝ ալգորիթմները հաճախ են սխալվում: Այսպես օրինակ՝ դրանց գործած ամենամեծ սխալներից էր վերջերս բրիտանական ֆունտի արժեզրկումը՝ ֆինանսական բոտերի գործողություններով պայմանավորված: Հոկտեմբերի սկզբին ֆունտը սրընթաց արժեզրկվեց 6%-ով, երբ բոտերը իրար հետեւից սկսեցին վաճառել արժույթը:
Տհաճ պատմության մեջ են ընկել նաեւ ռեփեր Դրեյքի երկրպագուները, ովքեր մյուս տարվա սկզբին ցանկանում էին նրա լոնդոնյան համերգին ներկա գտնվել: Ռեփերի երկրպագուները դժվար թե կարողանան գնել համերգի տոմսերը,իսկ խնդիրը ստեղծել են բոտերը, որոնք վայրկյանների ընթացքում գնել են օնլայն վաճառքի հանված բոլոր տոմսերը: Այժմ տոմսերը 50 ԱՄՆ դոլարի փոխարեն վերավաճառում են 800 ԱՄՆ դոլարով:
Բոտերը նաեւ սոցցանցերի մղձավանջն են դարձել: Դրանք այն լցրել են աղբով: Բավական է որեւէ գրառում անել, եւ ինչ-որ @WiniPhone700802268 սկսում է փչացնել գրառման մեկնաբանությունները պոռնոկայքերի գովազդով, բողոքում է The Guardian-ի թղթակիցը:
Բոտերը սոցցանցում նաեւ քաղաքական նպատակներով են օգտագործվել: Օրինակ՝ անցած տարի Մեքսիկայի իշխանություններն օգտագործեցին բոտերի մի ամբողջ բանակ՝ գործող նախագահի դեմ բողոքը ճնշելու համար: Իշխանությունների ստեղծած ալգորիթմները լրահոսում թոփ էին հանում կառավարությանը անհրաժեշտ հեշթեգերը:
Ինչպես գրում է The Guardian-ը, չաթբոտերը փչացրեցին Twitter-ը, սպանեցին ռոմանտիզմն ու շարունակում են սնանկացնել մարդկանց:
