Ռուսական կողմի հետ ձեռք է բերվել համաձայնություն, ըստ որի, հայկական կողմի ներկայացուցիչները՝ մեկ պատգամավոր եւ մեկ ցուցարար, կարող են գնալ ռուսական 102-րդ ռազմաբազա, տեսակցել Ավետիսյանների ընտանիքի 6 անձին սպանելու համար մեղադրվող ռուս զինծառայող Վալերի Պերմյակովին եւ տեսանկարահանել նրան, որպես ապացույց, որ Պերմյակովը դեռ Հայաստանի տարածքում է։ Այս մասին այսօր՝ հունվարի 15-ին, Գյումրիի դատախազությունում ՀՀ գլխավոր դատախազ Գեւորգ Կոստանյանի մասնակցությամբ խորհրդակցությունից դուրս գալով՝ ցուցարարներին ասաց Զարուհի Փոստանջյանը՝ նշելով, որ այդ ներկայացուցիչներին ընտրելու դեպքում իրենք հենց հիմա էլ կարող են գնալ ռազմաբազա։
Պատգամավորը նաեւ նշեց, որ Գեւորգ Կոստանյանը թեեւ խոստացել էր սարսափելի սպանդի մեջ մեղադրվող Վալերի Պերմյակովին հայկական կողմին հանձնելու խնդրանքով նամակ գրել ՌԴ գլխավոր դատախազին, սակայն իրեն ասել է, որ առայժմ չի կարող հստակ ժամկետներ նշել, թե երբ կգրի նամակը, քնաի որ իրեն դրա համար հիմքեր են հարկավոր։
Խորհրդակցության ընթացքում, ըստ Փոստանջյանի, քննարկվել է նաեւ այսօրվա բախումներում վիրավորվածների եւ բերման ենթարկվածների հարցը։ Վերջինների թիվը, ըստ Փոստանջյանի, մոտ տաս է։
Մեծ թվով ցուցարարներ շարունակում են կանգնած մնալ Գյումրիի դատախազության մոտ։