Գյումրիում ռուսական ռազմակայանի զինվոր Վալերի Պերմյակովը բացատրել է զորամասից իր դասալքության դրդապատճառները (ֆոտոռեպորտաժ):
Գյումրիում Պերմյակովի գործով դատավարության ժամանակ ամբաստանյալը հրաժարվել է ցուցմունքներ տալուց եւ հարցերի պատասխանելուց: Հետեւաբար դատարանը որոշել է հրապարակել նրա նախաքննության ժամանակ տված ցուցմունքները:
Վալերի Պերմյակովը հարցաքննությունների ժամանակ պնդել է, որ շատ է կարոտել տունը եւ ցանկացել է վերադառնալ Չիտա, դրա համար էլ որոշել է իր հերթապահության ժամանակ փախուստի դիմել, փող ու հագուստ ձեռք բերել ու հասնել ՌԴ:
Այս տարվա հունվարի 12-ին, գիշերը ժամը 02.00-ին նա հանել է զրահաբաճկոնն ու սաղավարտը, բայց պահել է զենքն ու սվին-դանակը, որի օգնությամբ կտրել է մետաղալարը: Նա կողոպտելու նպատակով մարդկանց է որոնել: Պերմյակովի խոսքով, ինքը քայլել է տների մոտով, որոնց դարպասները փակ են եղել, տեսել է բաց դռնակ, ծեծել է: Մոտ 5 րոպե կանգնել է դռնակի մոտ, ապա սվին-դանակի օգնությամբ հանել է ապակին: Ինքնաձիգը հանել է նախապահպանական վիճակից եւ դրել ավտոմատ կրակահերթի տակ: Մտել է տուն, ջուր է խմել:
Այնուհետեւ դատախազը բաց է թողել այն հատվածը, որը վերաբերում է սպանությանը, քանի որ այն քննելու են ՀՀ իրավապահ մարմինները:
Վերադառնալով ռուսական կողմից հետաքննվող մասի ցուցմունքին՝ դատախազը հայտնել է, որ Պերմյակովի խոսքով՝ նա բացել է պահարանը, հանել քաղաքացիական հագուստ եւ զգեստափոխվել: Կոշիկները նա հագել է դուրս գալուց առաջ: Տնից տարել է 3 բջջային հեռախոս եւ կանացի պայուսակից վերցրած գումար: Մտադիր էր հասնել մինչեւ հայ-թուրքական սահման: Սահմանի մոտ շինություն է հայտնաբերել, որտեղ մի քանի ժամ մնացել է: Հետո նրան ձերբակալել են ՌԴ սահմանապահները: Միաժամանակ պարզվել է, որ սահմանի ուղղությունը նա գիտեր մոտավորապես:
Իր կողմից Վալերի Պերմյակովը հայտարարել է, որ նորմալ է մեծացել: Մինչեւ զորակոչը հոգեկան հիվանդություններ չի ունեցել: Հաշվառման չի առնվել: Քիչ է խմել: Ալկոհոլի ազդեցության տակ իրեն նորմալ է պահում: Թմրանյութերից օգտագործել է մարիխուանա: Կախվածություն չունի:
Ցուցմունքից պարզ է դարձել, որ նա նախկինում էլ բազմիցս լքել է զորամասը, այդ թվում՝ զենքով: Նրա խոսքով՝ ծառայության պայմաններից գոհ է եղել, բայց ուզում էր տուն գնալ: Պարզվել է նաեւ, որ տանը նա ուզում էր թաքնվել տայգայում, իսկ զենքն անհրաժեշտ էր մարդկանց վախեցնելու եւ շներից պաշտպանվելու համար:
Պերմյակովը պնդում է, որ մտել է առաջին պատահած տունը, որտեղ թողել է ինքնաձիգն ու փախել:
Միաժամանակ ամբաստանյալը պնդում է, որ տնից ոչ մի հաղորդագրություն չի ստացել, որը կստիպեր նրան լքել զորամասը:
Նշենք, որ Գյումրիում հունվարի 12-ին Ավետիսյանների սպանության մեջ մեղադրվող ռուս զինծառայող Վալերի Պերմյակովի դատարավարությունը մեկնարկել է Գյումրիում: ՌԴ Հյուսիսկովկասյան մարզային զինվորական դատարանի ենթակայության ներքո գտնվող ռուսական կայազորային զինվորական դատարանը մեղադրյալի նկատմամբ վճիռ է կայացնելու երեք մեղադրանքներով՝ զենքով դասալքություն, զենքի եւ զինամթերքի հափշտակություն եւ զենքի եւ զինամթերքի անօրինական ձեռքբերելը, փոխանցելը, պահելը, տեղափոխելը կամ կրելը:
Սպանության մասով քրեական գործով կզբաղվեն հայկական դատական մարմինները: