Հայաստանը Ադրբեջանին եւ Իսրայելին չպետք է թույլ տա այդքան խորացնել երկկողմ համագործակցությունը։ NEWS.am–ի հետ զրույցում նման կարծիք է հայտնել Միջազգային հարաբերությունների եւ անվտանգության հայկական ինստիտուտի հիմնադիր, փորձագետ Ստեփան Սաֆարյանը՝ մեկնաբանելով Իսրայելի վարչապետ Բենիամին Նեթանյահուի այցելությունը Բաքու։
Նրա խոսքով՝ այդ համագործակցության հետեւանքները Հայաստանն իր վրա զգաց քառօրյա պատերազմի ժամանակ, երբ Բաքուն գործի դրեց Իսրայելից գնած անօդաչու սարքերը։
«Հայաստանը շատ հնարավորություններ ուներ Իսրայելի հետ հարաբերությունների բարելավման համար, սակայն մենք դրանցից չենք օգտվել, քանի որ արտաքին քաղաքականություն ուղղակի չունենք»,– ասել է Սաֆարյանը։
Նրա կարծիքով նման հնարավորություններից մեկը թուրք–իսրայելական հարաբերությունների վատթարացումն էր։ «Հայաստանը այդ կոնտեքստում կարող էր շատ օգուտներ քաղել, սակայն չօգտվեց այդ հնարավորությունից»,– ասել է Սաֆարյանը։
Ընդ որում, նա կարծում է, որ ԱԳՆ անգործունեությունից բացի, հարաբերությունների բացակայության վրա ազդում են նաեւ այլ տարածաշրջանային գործոններ, այդ թվում՝ ռուս–իրանական գործոնը։
