Իսրայելի հյուպատոսը պարբերաբար այցելում է Ալեքսանդր Լապշինին։ Այս մասին NEWS.am–ի թղթակցին հայտնել են Ադրբեջանում Իսրայելի դեսպանատնից։
«Ալեքսանդր Լապշինը գտնվում է քննչական մեկուսարանում համապատասխան պայմաններում։ Ադրբեջանի իշխանությունները բավարարել են Լապշինին այցելելու վերաբերյալ դեսպանատան խնդրանքները ու Իսրայելի հյուպատոս Լիլախ Աթիկասը հաճախ է այցելում նրան։ Դեսպանատունը հստակ գիտի, որ Լապշինին անհրաժեշտության դեպքում ցուցաբերվում է բուժօգնություն»,- նշվում է պատասխանի մեջ։ Միաժամանակ դեսպանատանը հրաժարվել են ավելի մանրակրկիտ տեղեկություններ հայտնել Ալեքսանդր Լապշինի վիճակի մասին՝ պատճառաբանելով անձնական տեղեկությունների գաղտնիությամբ ։
Հիշեցնենք, որ ադրբեջանական լրատվամիջոցների հաղորդագրությամբ օրերս Ալեքսանդր Լապշինին հոսպիտալիզացրել էին «տախիկարդիա» ախտորոշումով։
Հիշեցնենք նաեւ, որ Նասիմինի շրջանային դատարանի ապրիլի 7-ի որոշումով Լապշինի նկատմամբ խափանման միջոց ընտրված կալանավորումը երկարացվել է երեք ամսով։
Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
