Հայոց ցեղասպանության զոհերի հիշատակին ԱՄՆ Մասաչուսեթս նահանգի Վուստեր քաղաքում կազմակերպված միջոցառմանը թուրքեր են մասնակցել։
Լրագրող Բուրչին Գերչեկի խոսքով «Մենք պարտավոր ենք առերեսվել մեր անցյալին»։ «Իհարկե արդարադատության համար արդեն ուշ է, բայց համենայն դեպս ճանաչումը, պաշտոնական ներողությունն ու Թուրքիայում հայկական մշակութային ժառանգության նկատմամբ որոշակի քայլերը այդ ուղղությամբ դրական քայլեր կլինեին»,- նշել է նա Վուստերի հայկական մշակութային կենտրոնում իր ելույթի ժամանակ։
Քրիստոնյա Էմրե Չան Դաղլիօղլուն՝ Անթակիայից, համարում է, որ Թուրքիան պետք է ներողություն խնդրի այն ամենի համար, ինչ տեղի է ունեցել Օսմանյան կայսրությունում։ «Ես նույնպես ժխտման մի մասն եմ։ Որպես Թուրքիայի քաղաքացի՝ ես արտոնություններ ունեմ գտնվել Թուրքիայում, ի տարբերություն այն հայերի կամ հույների, որոնք սպանվել կամ արտաքսվել են Թուրքիայից։ Ահա թե ինչու ես մտածում եմ, որ ես պետք է ներողություն խնդրեմ»,- ասել է նա։
Վուստերի հայկական համայնքը ձեւավորվել է 19-րդ դարի 90-ականներին։ Սուրբ Փրկչի հայկական եկեղեցին առաջին հայկական եկեղեցին է, որը կառուցվել է Արեւմտյան կիսագնդում։ ՀԻմա համայնքում մոտ 5 հազար մարդ կա։