Հայ դատի Ամերիկայի հանձնախմբի գործադիր տնօրեն Արամ Համբարյանը տարածել է հայտարարություն այն բանից հետո, երբ նախագահ Դոնալդ Թրամփը հրաժարվել է Ապրիլի 24-ին՝ Հայոց ցեղասպանության զոհերի հիշատակի օրը, իր հայտարարության մեջ ճանաչել Հայոց ցեղասպանությունը։
Համբարյանի խոսքով, իր հայտարարությամբ նախագահ Թրամփը սատարեց Թուրքիայի լռեցման քաղաքականությունը՝ Հայոց ցեղասպանության դատապարտման եւ զոհերի ոգեկոչման ԱՄՆ քաղաքականությանը հետեւելու փոխարեն։
«Չկարողանալով պատշաճ ձեւով հարգել զոհերի հիշատակը Ապրիլի 24-ին՝ Թրամփը, փաստորեն, ցեղասպանությունների կանխմանն ուղղված ԱՄՆ քաղաքականությունը հանձնեց Ռեջեփ Էրդողանի՝ մեծամիտ ու ավտորիտար բռնապետի ձեռքը, որը հրապարակավ շանտաժի է ենթարկում ԱՄՆ նախագահներին՝ ստիպելով լռել միլիոնավոր հայերի, հույների, ասորիների ու Թուրքիայի մյուս քրիստոնյաների զանգվածային սպանությունների մասին»,- ասել է նա։
