«Ես վստահ եմ, որ գալու է օրը, երբ Թուրքիան կճանաչի Հայոց ցեղասպանությունը»: Այս մասին Բեռլինում` Գերմանիայի պատմության թանգարանում, Հայոց ցեղասպանության հիշատակին նվիրված միջոցառման ժամանակ NEWS.am-ի թղթակցին ասել է բռնցքամարտիկ Արթուր Աբրահամը:
Բռնցքամարտիկը լավատես է Ցեղասպանության միջազգայնորեն ճանաչվելու հարցում եւ վստահ է, որ Թուրքիան ստիպված է լինելու ճանաչել Ցեղասպանությունը: «Հպարտ եմ, որ այսօր Բեռլինում նման միջոցառում է անցկացվում` ի հիշատակ անմեղ զոհերի: Հայ ազգը երբեք չի մոռանա կատարվածը եւ ի վերջո կհասնի նրան, որ Թուրքիան ու մյուս երկրները, որոնք դեռ չեն արել դա, ընդունեն Հայոց ցեղասպանության փաստը: Ես վստահ եմ, որ գալու է այդ օրը, որովհետեւ անհնար է անել մի բան եւ ձեւացնել, թե նման բան չի եղել»,- նշել է Աբրահամը:
Անդրադառնալով այդ հարցում Գերմանիայի ունեցած դերին` Արթուր Աբրահամը նշեց. «Գերմանիան Եվրոպայի ամենահզոր երկրներից մեկն է: Եթե այդ պետությունն այսօր ճանաչում է Ցեղասպանությունը, դա շատ մեծ շանս է, որ մյուս երկրներն էլ ճանաչեն եւ թուրքերին ստիպեն ճանաչել Ցեղասպանությունը»:
