Եվրոպական խորհրդարանը սկսել է ընթացակարգ, որը կարող է Ֆրանսիայի նախագահի ուլտրաաջ թեկնածու Մարին Լը Պենին զրկել պատգամավորական իմունիտետից՝ ԵՄ միջոցների ոչ իրավաչափ գործածման կասկածների պատճառով։ Այս մասին հայտնել է Եվրախորհրդարանի ղեկավար Անտոնի Տայանին, փոխանցում է «Ամերիկայի ձայնը»։
Ֆրանսիական դատարանները խնդրել են եվրոպական օրենսդիրներին զրկել Լը Պենին պատգամավորական անձեռնմխելիությունից, որպեսզի շարունակեն նրա նկատմամբ հետաքննությունը՝ «Ազգային ճակատ» կուսակցության աշխատակիցներին ԵՄ հիմնադրամներից աշխատավարձ վճարելու մեջ կասկածանքներով։
Հարցումը «փոխանցվել է Եվրախորհրդարանի իրավաբանական հանձնաժողովին, որը պատասխանատու է նման հարցերի համար», ասել է Տայանին պատգամավորներին Բրյուսելում նիստի սկզբին։ Այդ քայլով պաշտոնապես մեկնարկել է ընթացակարգը։
