Բլոգեր Ալեքսանդր Լապշինի հետ անարդարացի են վարվել: Ադրբեջանը սխալ է ներկայացնում Լապշինի գործը, այդ թվում՝ նաեւ Ինտերպոլին հղած ուղերձին վերաբերող մասով: Այս մասին հայտարարել է ԵԽԽՎ պատգամավոր Բերնդ Ֆարբրիտիուսը՝ ներկայացնելով բանաձեւի նախագիծ՝ հիմնված «Ինտերպոլի համակարգի օգտագործման չարաշահումը. անհրաժեշտ են ավելի խիստ իրավական երաշխիքներ» զեկույցի վրա:
«Չնայած նրան, ինչպես դա նեկայացնում են Ադբեջանի իշխանությունները, որը որսացին լրատվամիջոցները, այդ թվում՝ BBC-ն, պարոն Լապշինի դեմ կարմիր ծանուցումը չի տրվել շատ տարիներ առաջ Լեռնային Ղարաբաղ այցելելու համար: Պարոն Լապշինը հայտի գործողության տակ է հայտնվել այլ ուղեւորությունների պատճառով»,- ապրիլի 26-ին ԵԽԽՎ-ի գարնանային նստաշրջանի ընթացքում հայտարարել է Ֆարբրիտիուսը:
Ավելի վաղ NEWS.am-ը հայտնել էր, որ Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
