Եվրամիության եւ Թուրքիայի հարաբերությունները Բելգիայի մայրաքաղաքում կայացած գագաթնաժողովին մանրամասն չեն քննարկվել: Թուրքիայի նախագահ Ռեջեփ Թայիփ Էրդողանի հետ հանդիպման փորձ կարվի մայիսին, ՆԱՏՕ-ի հանդիպման ժամանակ: ՏԱՍՍ-ի փոխանցմամբ՝ այս մասին մամուլի ասուլիսում հայտարարել է Գերմանիայի կանցլեր Անգելա Մերկելը:
«Գագաթնաժողովից առաջ ես զրուցեցի Դոնալդ Տուսկի հետ: Մենք քննարկեցինք, թե ինչ դիրքորոշում ենք որդեգրելու Թուրքիայի նկատմամբ: ԵՄ ղեկավարն ասաց, որ այդ հարցի շուրջ պաշտոնական քննարկում կարելի է ունենալ 28 պետությունների ներգրավմամբ»,- նշել է նա՝ հավելելով. «Նա պարզաբանեց, որ Եվրահանձնաժողովի նախագահ Ժան-Կլոդ Յունկերի հետ միասին կփորձեն Էրդողանին հանդիպել ՆԱՏՕ-ի գագաթնաժողովի ժամանակ»:
ՆԱՏՕ-ի հերթական գագաթնաժողովը նախանշված է մայիսի 25-ին Բրյուսելում:
