Գյումրի-Երեւան ավտոճանապարհին 2014թ. մարտի 11-ին 2 մարդու կյանք խլած վթարի գործով դատաքննությունը դեռ շարունակվում է:
NEWS.am-ի թղթակցին տուժողի իրավահաջորդի ներկայացուցիչ Ռուբիկ Մովսիսյանը հայտնեց, որ մի քանի նիստ առաջ պետք է դատաքննության ավարտ հայտարարվեր, սակայն պաշտպանական կողմը դատաքննությունը լրացնելու միջնորդություններ է ներկայացնում:
«Ամբաստանյալ Գուրգեն Համբարձումյանի պաշտպանը միջնորդել է հարցաքննել նոր վկաների, լրացուցիչ հարցաքննության հրավիրել նախկինում ցուցմունք տված վկաների»,- ասաց Ռուբիկ Մովսիսյանը:
Նշենք, որ ողբերգական վթարի օրը Գուրգեն Համբարձումյանն իր վարած «Ֆոլկսվագեն Ջետտա» մակնիշի մեքենայով դուրս է եկել իր երթեւեկելի գոտուց, մտել հանդիպակաց երթեւեկելի գոտի եւ թեքությամբ հարվածել իր երթեւեկելի գոտով դեպի Երեւան ընթացող Արամայիս Քանանյանի վարած «Վազ 2106» մակնիշի ավտոմեքենային: Վթարի հետեւանքով վարորդ Արամայիս Քանանյանը եւ զոքանչը` Սիլվա Գեւորգյանը, մահացել էին, իսկ մյուս ուղեւորուհին` Ռուզաննա Ղազարյանը, ծանր մարմնական վնասվածքներով տեղափոխվել էր հիվանդանոց:
Գուրգեն Համբարձումյանին մեղադրանք է առաջադրվել Քրեական օրենսգրքի 242-րդ հոդվածի 3-րդ մասով, նա գրավի դիմաց ազատ է արձակվել: Համբարձումյանին մեղադրանք էր առաջադրվել դեպքից շուրջ մեկ տարի անց, քանի որ փորձաքննությունների եզրակացությունները ձգձգվում էին, իսկ նա էլ անընդհատ փոխում էր ցուցմունքը: