Անձի առեւանգման գործով մեղադրվող գործարար Բաղդասար Խալաթյանի եւ նրա որդու վերաբերյալ մեղադրական դատավճիռ է կայացվել:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը մեքենաների առքուվաճառքով զբաղվող գործարար Բաղդասար Խալաթյանին դատապարտել է 5 տարվա պայմանական ազատազրկման, իսկ որդուն՝ Հովհաննես Խալաթյանին՝ 5 տարվա ազատազրկման:
Նշենք, որ ըստ մեղադրանքի, Հովհաննես Խալաթյանը հոր պահանջով Կարեն Վարդանյանի հետ Շենգավիթ համայնքից 2015թ. փետրվարի 10-ին առեւանգել էր Արարատ Մանուկյանին եւ տեղափոխել իրենց ընտանիքին պատկանող տաքսի ծառայության գրասենյակի 1-ին հարկում գտնվող սենյակ, որտեղ նրան պահել էին 18 օր եւ խոշտանգել։ Բացի դրանից Կարեն Վարդանյանի օժանդակությամբ Բաղդասար Խալաթյանը հափշտակել էր 19 մլն դրամ արժողությամբ ավտոմեքենա:
Կարեն Վարդանյանին նույնպես դատարանը մեղավոր է ճանաչել եւ դատապարտել 5.5 տարվա ազատազրկման:
Հիշեցնենք, որ գործարար Բաղդասար Խալաթյանն առաջին անգամ չէ, որ ընտանիքի հետ հայտնվում է իրավապահ մարմինների ուշադրության կենտրոնում: 2014թ.-ի ամռանը նրա հարսի ծնողները հաղորդում էին ներկայացրել ոստիկանություն, թե Խալաթյանի կինը ծեծել է նրանց: Հարուցված քրեական գործն ավելի ուշ կարճվել էր։
Բացի դրանից, դեռ 2007թ.-ին մեքենաների առքուվաճառքով զբաղվող գործարարը, ըստ մամուլի հրապարակումների, հողատարածքի համար վիճել էր քանդակագործ Վաչագան Մանսուրյանի կնոջ հետ եւ ծեծել նրան:
