Արարատի մարզի Ուրցաձոր գյուղում հոկտեմբերի 1-ին չինուհու նկատմամբ սեքսուալ բնույթի բռնի գործողություններ կատարելու գործով դատական նիստերը հնարավոր է անցկացվեն դռնփակ:
NEWS.am-ի տեղեկություններով, դեկտեմբերի 8-ին կայանալիք նիստում Արարատի եւ Վայոց ձորի մարզերի ընդհանուր իրավասության դատարանը թերեւս որոշում կկայացնի գործը քննել դռնփակ: Նշենք, որ այս գործով նոյեմբերի 13-ին նշանակված առաջին դատական նիստը հետաձգվել էր, քանի որ տուժողը չէր ներկայացել: Դատավորը որոշում է կայացրել նախ պարզել՝ արդյոք տուժողը Հայաստանում է, թե ոչ: Նշենք, որ այս գործով տուժողը Չինաստանի քաղաքացի է, որը Հայաստան էր եկել որպես զբոսաշրջիկ: Տեղեկություններ կան, որ նա Հայաստանում չէ: Չի բացառվում, որ նիստերը կանցկացվեն տուժողի բացակայությամբ:
Ըստ մեղադրական եզրակացության՝ հոկտեմբերի 1-ին ժամը 16.00-ի սահմաններում Խաչիկն իր ավտոմեքենայով նկատել է Խոր Վիրապՙի մոտ նկատել է մինչ այդ իրեն անծանոթ չինուհուն: Ավտոմեքենան կանգնեցնելով նրա մոտ` Խաչիկը, ձեռքերի շարժումներով և ժեստերով հաղորդակցվելով՝ հասկացել է, որ չինուհին ցանկանում է գնալ Երևան, որից հետո առաջարկել է նրան նստել իր ավտոմեքենան: Կնոջ նստելուց հետո Խաչիկը մեքենան քշել է դեպի Ուրցաձոր, որտեղ ցանկացել է սեռական հարաբերություն ունենալ նրա հետ, սակայն վերջինս դիմադրել է եւ թույլ չի տվել: Այնուհետեւ Խաչիկը սկսել է ծեծել չինուհուն, միաժամանակ կատարել սեքսուալ բնույթի բռնի գործողություններ:
Նախկինում դատապարտված, դատվածությունը չմարված Խաչիկին մեղադրանք է առաջադրվել Քրեական օրենսգրքի 139-րդ հոդվածի 1-ին մասով: Նա կալանավորված է:
