Վարչական դատարանը վարույթ է ընդունել զորացրված զինծառայող Ռազմիկ Պետրոսյանի հայցն ընդդեմ Պաշտպանության նախարարության: Այս մասին NEWS.am-ի հետ զրույցում ասաց Ռազմիկ Պետրոսյանի շահերի պաշտպան Աշխեն Դաշյանը:
Նշենք, որ զորացրված Ռազմիկ Պետրոսյանը Վարչական դատարան հայցը ներկայացրել էր դեկտեմբերի 5-ին՝ ՊՆ-ից պահանջելով զինգրքույկում համապատասխան գրառում կատարել ապրիլյան պատերազմի մարտական գործողություններին մասնակցելու մասին։
«Վարույթն ընդունվել է, սակայն դեռ դատի օրը նշանակված չէ: Մենք հայց ենք ներկայացրել վարչական դատարան ընդդեմ պաշտպանության նախարարության, որ Ռազմիկ Պետրոսյանի զինգրքույկում գրառում արվի, այն մասին, որ նա մասնակցել է մարտական գործողություններին: Նշեմ, որ նա ոչ միայն այդ օրերին է գտնվել մարտական դիրքերում, այլեւ ապրիլյան պատերազմից հետո 3 ամիս շարունակ մնացել է դիրքերում եւ մարտական հերթապահություն է իրականցրել, այնինչ 15 օր պետք է իրականացներ»,-ասաց պաշտպանը:
Աշխեն Դաշյանի խոսքով` մինչեւ Վարչական դատարան դիմելը իրենք վերադասության կարգով բողոքարկել են այս հարցով պաշտպանության նախարարություն, սակայն, բացասական պատասխան են ստացել. «Մեզ պատասխանել են, որ Ռազմիկ Պետրոսյանը իրականացրել է մարտական հերթապահություն եւ ոչ մարտական գործողություն, այդ պատճառով նրա զինգրքույկում գրառում չի կատարվել»:
Փաստաբանը նշեց, որ Ռազմիկ Պետրոսյանը որեւէ արտոնությունից չի օգտվելու, քանի որ գտնվում է արտերկրում, ուղղակի ցանկանում է վերականգնել իր իրավունքները եւ արդարությունը:
«Նա միայն ծառայություն իրականացնելու համար էր եկել Հայաստան, չնայած որ կարող էր չգար, այժմ էլ ինքը ՌԴ-ում է, որեւէ արտոնությունից չի օգտվելու իրեն միայն հետաքրքրում է այն, որ խտրական վերաբերմունք չցուցաբերվի, իր իրավունքը վերականգնվի, զինգրքույկում գրառում կատարվի, քանի որ իր հետ նույնանման ծառայություն կատարած զինվորների գրքույկներում գրառում կատարվել է, իր գրքույկում` ոչ»,-ասաց Աշխեն Դաշյանը:
