Կատալոնիայի անկախությանը կողմ հանդես եկող կուսակցությունները դատական հայց են նախապատրաստում Իսպանիայի կառավարության դեմ: Այս մասին հաղորդում է «ՌԻԱ Նովոստի»-ն:
Հայց ներկայացնելու պատճառն այն է, որ կառավարությունը մտադիր է կատալոնյան խորհրդարանում արգելափակել Կառլես Պուչդեմոնի թեկնածության հաստատումը, որն այժմ գտնվում է Բրյուսելում:
Իսպանիայի փոխվարչապետ Սորայա Սաենս դե Սանտամարիան հինգշաբթի օրը հայտնել էր, որ կառավարությունը Պուչդեմոնի թեկնածության առաջադրման կապակցությամբ կդիմի Սահմանադրական դատարան: Իշխանությունները Պետական խորհրդից որոշում են պահանջել այս հարցի կապակցությամբ, քանի որ իրենք այդ քայլը անօրինական են համարում:
Պետական խորհուրդն իր հերթին հայտարարել է, որ նման պահանջի համար իրավական հիմքեր չկան: Պուչդեմոնի ծրագրի եւ ինքնավար համայնքի կառավարության ղեկավարի պաշտոնում իր թեկնածության քվեարկությունը նախատեսված է հունվարի 30-ին:
«Մենք աշխատում ենք Նախարարների խորհրդի դեմ քրեական գործի հարուցման հնարավորության ուղղությամբ` Քրեական օրենսգրքի 498-րդ հոդվածի համաձայն, որը վերաբերում է իշխանության կողմից ուժի, ահաբեկման կամ սպառնալիքների օգտագործմանը, որոնք խոչընդոտում են իշխանության ներկայացուցիչների կողմից իրենց պարտականությունների պատշաճ կերպով կատարմանը», - Cadena Ser ռադիոկայանին տված հարցազրույցում հայտարարել է Իսպանիայի խորհրդարանի ստորին պալատի կատալոնյան պատգամավոր Ժոզեպ Ռուլը:
