Հայերը ցեղասպանություն են վերապրել եւ շատ բաների միջով են անցել, որովհետեւ քրիստոնեության կղզի են եղել։ Այս մասին լրագրողների հետ զրույցում հայտարարել է Սլովակիայի Ազգային խորհրդի նախագահ Անդրեյ Դանկոն Բրատիսլավայում իր հայաստանյան գործընկեր Արա Բաբլոյանի հետ հանդիպումից հետո, հաղորդում է ՏԱՍՍ-ը։
Նրա խոսքով՝ ժամանակակից պատմության մեջ հայերը ցեղասպանություն վերապրած առաջին ժողովուրդն են եղել: «Հայերը ցեղասպանություն են վերապրել, նրանք հարձակումների թիրախ են եղել եւ շատ բաների միջով են անցել, որովհետեւ նրանք եղել են քրիստոնեության կղզի (Օսմանյան կայսրությունում): Ես չեմ թաքցնում, որ մեծ թրթիռով եւ հարգանքով եմ վերաբերվում քրիստոնեության արժեքներին: Հայերը պայքարել են իսլամացման դեմ եւ հալածվել: Միլիոնավոր հայեր ճնշման են ենթարկվել»,-նշել է նա:
Դանկոն հիշեցրել է, որ Օսմանյան կայսրությունը 16-րդ դարի երկրորդ կեսից մինչեւ փաստացիորեն 17-րդ դարի վերջը ստրկացրել էր Սլովակիայի տարածքների մեծ մասը։ «Մեր նախնիները հայրենական գրականության մեջ նկարագրել են մեր ազգի տառապանքները։ Սլովակները շատ լավ են հիշում, թե ինչի միջով են հայերը ստիպված եղել անցնել»,-նշել է նա։