Գյումրիում ռուսական 102-րդ ռազմաբազայում ռազմական ոստիկանության ստորաբաժանումներ ձեւավորելու հարցի շուրջ Ռուսաստանի եւ Հայաստանի միջեւ քննարկումները շարունակվում են։ Այս մասին NEWS.am-ի հետ զրույցում ասել է պաշտպանության նախարարության մամուլի խոսնակ Արծրուն Հովհաննիսյանը։
«Ռազմաբազայի զորամասերում կարգապահությունն ամրապնդելու համար մեր դիմումների ու բարձրացրած հարցերից հետո քննարկվում է ռազմական ոստիկանության ուժերի տեղակայման մասին հարցը, բայց թե ինչ անել, ինչպես անել, որ ինչ կազմով լինի, քննարկումների փուլում է։ Մեզ մոտ էլ կոնկրետ իրավական փաստաթղթերի հիմնավորում պետք է անցնի, նոր տեղի ունենա, առայժմ այդ ամենն ավարտված չէ։ Մենք ասել ենք՝ էնտեղ որոշակի խնդիր կա, պետք է լուծել, հիմա իրենք էդ հարցը ինչպես են լուծում, ինչ են անում, իրավական քննարկումներ են տեղի ունենում»։
Արծրուն Հովհաննիսյանը վստահեցրել է, որ ռուսական ռազմական ոստիկանության առկայությունը խոչընդոտ չի լինի հայաստանյան իրավապահ կառույցների գործունեությանը, եթե դեպքեր արձանագրվեն ռազմաբազայում։
«Ռազմական ոստիկանությունն ունի կանխարգելման գործառույթ, իրենց ավտոշարասյունները ուղեկցելու գործառույթ, անվտանգության ապահովման գործառույթ եւ այլն»,-ասաց նա:
Հիշեցնենք, որ Ռուսաստանի զինված ուժերի Հարավային օկրուգի մամուլի ծառայությունը նախօրեին հայտարարել էր Գյումրիում ռուսաստանյան 102- րդ ռազմաբազայում ռազմական ոստիկանության ստորաբաժանումներ ձեւավորելու մասին։ «Նախկինում բազայում կարգուկանոնի պահպանման համար հատկացվում էին առանձին պարեկներ, սակայն դրանց կազմում ընդգրկված զինծառայողները չէին անցնում հատուկ նախապատրաստություն։ Ներկայում ստեղծվող ջոկատներում ներգրավվելու են մասնագետներ, որոնք վարժանքներ են անցել Վլադիկավկազի ռազմական ոստիկանության ուսումնական կենտրոնում»,- ասված է Հարավային օկրուգի մամուլի ծառայության հաղորդագրության մեջ։