Նախընտրելի
Գերմանիայի կանցլեր Ֆրիդրիխ Մերցի «Քրիստոնեա-դեմոկրատական միություն» (ՔԴՄ) կուսակցությունում մտավախություն ունեն, որ սեպտեմբերի 20-ին կայանալիք Մեկլենբուրգ-Արևմտյան Պոմերանիա երկրամասի խորհրդարանական ընտրություններում կարող են չհաղթահարել 5 տոկոսի շեմը:
«Մտավախություն կա 5 տոկոսի շեմը չհաղթահարելու վերաբերյալ», — Tagesspiegel թերթին հայտնել է երկրամասային խորհրդարանում ՔԴՄ խմբակցության փոխնախագահ Մարկ Ռայնհարդտը: Գերմանիայի օրենսդրությամբ՝ երկրամասային կամ դաշնային խորհրդարան անցնելու համար կուսակցությունները պետք է ստանան քվեների առնվազն 5%-ը:
Վերջին հարցումների համաձայն՝ ՔԴՄ-ն կարող է ակնկալել քվեների ընդամենը 7%-ը: Եթե այս կանխատեսումն արդարանա, սա կլինի կուսակցության վատթարագույն արդյունքը Երկրորդ աշխարհամարտից ի վեր: ՔԴՄ-ն, Սոցիալ-դեմոկրատական կուսակցության (ԳՍԴԿ) հետ մեկտեղ, հանդիսանում է Գերմանիայի երկու ավանդական խոշորագույն քաղաքական ուժերից մեկը:
Մեկլենբուրգ-Արևմտյան Պոմերանիայում նախընտրական պայքարի առաջատարն է մնում ծայրահեղ աջ «Ալտերնատիվ Գերմանիայի համար» (ԱԳՀ) կուսակցությունը, որին աջակցում է ընտրողների 35–37%-ը: Կուսակցությունը մտադիր է ամրապնդել դիրքերը հարևան արևելյան Սաքսոնիա-Անհալթ երկրամասի ընտրություններում անցյալ շաբաթ արձանագրած համոզիչ հաղթանակից հետո:
Երկրորդ տեղում է երկրամասի գործող վարչապետ Մանուելա Շվեզիգի ԳՍԴԿ-ն, որը կարող է ստանալ քվեների շուրջ 34%-ը: Միևնույն ժամանակ, հարցումները ցույց են տալիս, որ սոցիալ-դեմոկրատներին վերջին շաբաթներին հաջողվել է էապես կրճատել ԱԳՀ-ից ունեցած պակասը:
Երկրամասի վարչապետի պաշտոնում ՔԴՄ թեկնածու Դանիել Փեթերսը նախընտրական քարոզարշավի ընթացքում փորձում է հեռավորություն պահպանել Մերցից, ում վարկանիշը վերջին ամիսներին կտրուկ անկում է ապրել:
Մեկլենբուրգ-Արևմտյան Պոմերանիայի ընտրությունները տեղի կունենան Բեռլինի ընտրությունների հետ միաժամանակ: Մայրաքաղաքում ՔԴՄ-ին նույնպես բարդ պայքար է սպասվում իշխող բուրգոմիստրի պաշտոնի համար, որին հավակնում են ՔԴՄ-ի, ԱԳՀ-ի և Ձախերի կուսակցության ներկայացուցիչները:
