նախընտրելի դարձնել
ԱՄՆ նախագահ Դոնալդ Թրամփը խորհրդարանական ընտրություններից առաջ աջակցել է Իսրայելի վարչապետ Բենիամին Նեթանյահուին, սակայն ԱՄՆ առաջնորդի մի շարք մերձավոր խորհրդականներ կարծում են, որ նրա մերձավորարևելյան օրակարգը կարող է ավելի լայն հնարավորություններ ստանալ Իսրայելում այլ կառավարության պայմաններում, հայտնել է Axios-ը՝ հղում կատարելով ամերիկացի պաշտոնյաներին։
Թրամփի խորհրդականներից մեկի խոսքով՝ ԱՄՆ նախագահը առաջնորդվում է «ավելի լավ է ծանոթ սատանան» սկզբունքով․ նա երբեք չի աշխատել իսրայելական որևէ վարչապետի հետ, բացի Նեթանյահուից, և անձամբ ծանոթ չէ մյուս թեկնածուներին։ Միևնույն ժամանակ, երկու առաջնորդների հարաբերությունները, չնայած մտերմությանը, բազմիցս բարդացել են տարաձայնությունների պատճառով։
Կիրակի օրը, մի քանի շաբաթ տատանվելուց հետո, Թրամփը հրապարակայնորեն աջակցեց Նեթանյահուին և հասկացրեց, որ նրա պարտությունը կարող է ազդել ԱՄՆ և Իսրայելի հարաբերությունների վրա։ Սակայն ամերիկացի պաշտոնյաներից մեկն այս որոշումն անվանել է ԱՄՆ նախագահի համար շահեկան ցանկացած պարագայում։ Եթե Նեթանյահուն պահպանի իշխանությունը, Թրամփը կկարողանա իրեն վերագրել նրա քաղաքական փրկության մեջ ունեցած դերը և օգտագործել այդ ազդեցությունը՝ զիջումներ կորզելու համար։ Իսկ եթե ընդդիմությունը ձևավորի կառավարություն, Իսրայելի նոր առաջնորդներն ամեն դեպքում շահագրգռված կլինեն Վաշինգտոնի հետ լավ հարաբերություններ ունենալու մեջ։
Axios-ի տվյալներով՝ Թրամփի բազմաթիվ խորհրդականներ դեմ էին իսրայելական ընտրարշավին միջամտելուն։ ԱՄՆ փոխնախագահ Ջեյ Դի Վենսը նույնպես հրաժարվել է աջակցել Նեթանյահուին։ «Ես չեմ քննադատում Բիբի Նեթանյահուին։ Ես չեմ աջակցում Բիբի Նեթանյահուին։ Կարծում եմ, որ ի վերջո ամենակարևորը նախագահի աջակցությունն է», — հայտարարել է նա լրագրողներին։ Վենսը պարզաբանել է, որ այլևս մտադիր չէ միջամտել այլ երկրների ընտրություններին։
Նեթանյահուից դժգոհությունն ուժեղացել է Իրանի հետ պատերազմից հետո։ Պարբերականի տվյալներով՝ վարչակազմի որոշ ներկայացուցիչներ կարծում են, որ իսրայելական վարչապետի նախապատերազմյան գնահատականները, որոնք ներկայացվել էին Սպիտակ տանը, սխալ են եղել։ Բացի այդ, Թրամփի հատուկ բանագնացներ Սթիվ Ուիթքոֆը և Ջարեդ Քուշները դժգոհ են Գազայի հատվածում խաղաղության ծրագրի դանդաղ առաջընթացից։ Հատուկ բանագնաց Թոմ Բարաքը քննադատում է Սիրիայի նկատմամբ իսրայելական կառավարության մոտեցումը, իսկ պետքարտուղար Մարկո Ռուբիոն և նրա թիմը կարծում են, որ Իսրայելը կարող էր ավելի ակտիվորեն ամրապնդել Լիբանանի կառավարությունը և զսպել Հորդանան գետի Արևմտյան ափում պաղեստինցիների վրա վերաբնակների հարձակումները։
Իսրայելի երեք խոշոր հեռուստաալիքների նախընտրական հարցումները ցույց էին տալիս, որ Նեթանյահուի կոալիցիան 120 տեղանոց Քնեսեթում կարող է ստանալ ընդամենը 50 տեղ՝ 17-ով պակաս, քան ունի այժմ։ Նախկին Գլխավոր շտաբի պետ Գադի Այզենկոտի գլխավորած ընդդիմադիր դաշինքը, ըստ կանխատեսումների, կարող էր հույս դնել 52–56 մանդատի վրա։ Սակայն ճամբարներից ոչ մեկը չուներ 61 տեղից բաղկացած մեծամասնության հասնելու ակնհայտ ուղի։
Ընտրությունների արդյունքները կարող են ազդել Իրանի դեմ հնարավոր նոր լայնածավալ ռազմական գործողության վերաբերյալ Թրամփի որոշման վրա։ Միաժամանակ, ԱՄՆ նախագահը ձգտում է առաջ մղել Գազայի համար խաղաղության ծրագիրը, պայմանավորվել Իսրայելի հարաբերությունների կարգավորման շուրջ Լիբանանի և Սիրիայի հետ և հասնել Իսրայելի ու Սաուդյան Արաբիայի միջև պատմական խաղաղության համաձայնագրի։ Եթե կառավարություն ձևավորել չհաջողվի, Իսրայելը կարող է բախվել նոր քաղաքական ճգնաժամի, իսկ Նեթանյահուն կմնա վարչապետի ժամանակավոր պաշտոնակատար։
