նախընտրելի դարձնելՀայաստանում Միացյալ Թագավորության դեսպան Ջոնաթան Էյվսը ուղերձ է հղել ՄԹ նախկին վարչապետ Մարգարեթ Թեթչերի մահվան կապակցությամբ:
Ուղերձում, մասնավորապես, ասվում է.
«Ցավալի էր լսել Լեյդի Թեթչերի մահվան լուրը: Նա հիանալի կին էր, ով ոգեշնչել է աշխարհին իր քաջությամբ եւ վճռականությամբ: Հայաստանում նրան մասնավորապես կհիշեն 1990թ-ին կատարած այցելությամբ, երբ Գյումրիում մասնակցեց 1988-ի երկրաշարժից հետո վերականգնված Լորդ Բայրոնի անվան դպրոցի բացման արարողությանը: Մենք կիսում ենք Լեյդի Թեթչերի ընտանիքի վիշտը եւ մեր մտքերը նրանց հետ են»:
Միացյալ Թագավորության նախկին վարչապետ Մարգարեթ Թեթչերի մահվան կապակցությամբ, Երեւանում Բրիտանական դեսպանատանը տեղադրված է սգո մատյան եւ ցանկացողները կարող են գալ ու գրառել իրենց ցավակցական ուղերձները:
Ավելի վաղ NEWS.am-ը հայտնել էր, որ Մեծ Բրիտանիայի նախկին վարչապետ, «Երկաթյա լեդի» Մարգարեթ Թեթչերը մահացել է ապրիլի 8-ի առավոտյան, 87 տարեկան հասակում: Նրա պաշտոնական ներկայացուցիչ Լորդ Բելլի հաղորդագրության մեջ ասվում է, որ Թետչերը մահացել է ուղեղի կաթվածից, հայտնում է BBC-ն:
Մարգարետ Թետչերը Մեծ Բրիտանիայի առաջին եւ առայժմ միակ կին վարչապետն է, ով ղեկավարել է 1979-90 թվականներին: Կոշտ բնավորության համար նրան անվանում էին «Երկաթյա Լեդի»: Նա անընդմեջ երեք ընտրություն է հաղթել, բայց ստիպված էր հրաժարական տալ` նախքան չորրորդ ընտրությունը:
10 տարի առաջ նա մի քանի միկրոինսուլտներ էր տարել, եւ դրանից հետո տառապում էր հիշողության կարճաժամկետ կորստյամբ ու հազվադեպ էր հայտնվում հասարակության մեջ:
Լուսանկարը՝ Արսեն Սարգսյանի/NEWS.am
