«Կանեփ-կակաչ-2013» համալիր կանխարգելիչ միջոցառման շրջանակներում, օգոստոսի 17-ին, ժամը 12.00-ին,  ոստիկանության Արաբկիրի բաժնի  ծառայողները, իրացնելով ստացված օպերատիվ տվյալները,  ոստիկանության Երեւան քաղաքի վարչության  ծառայողների հետ համատեղ, Տիգրան Մեծի պողոտայի թիվ 38 հասցեի մոտից, ապօրինի թմրամիջոցներ պահելու կասկածանքով, իր «Մերսեդես E-500» մակնիշի ավտոմեքենայով բերման են ենթարկել Վրաստանի քաղաքացի, 1982 թ. ծնված  Էդգար Հ.-ին:

Ոստիկանության լրատվական վարչությունից հայտնում են, թե նրա մոտ, խուզարկությամբ, հագի սպորտային համազգեստի  գրպանից հայտնաբերվել եւ առգրավվել է պոլիէթիլենային պարկի մեջ լցված սպիտակադեղնավուն փոշենման զանգված` ընդհանուր 39.3 գ, վերնաշապիկի  գրպանից հայտնաբերվել է պոլիէթիլենային 4 պարկ, որոնց մեջ լցված էր կանաչավուն գույնի յուրահատուկ հոտով չորացված բույսերի 7.5 գ զանգված, իսկ ավտոմեքենայի զննությամբ, սրահի առջեւի նստատեղերի արանքում գտնվող պահեստատուփի միջից հայտնաբերվել եւ առգրավվել է պոլիէթիլենային 3 պարկ, որոնց մեջ լցված էր կանաչավուն գույնի յուրահատուկ հոտով չորացված բույսերի զանգված`   5.8 գ:

Հայտնաբերվածն ուղարկվել է փորձաքննության:

Կատարվում է հետաքննություն