Գերմանիայի բնակիչների համար սովորական հեծանիվների գները միանգամայն  ընդունելի են: Մայրաքաղաք Բեռլինի առեւտրային ցանցերից մեկում, օրինակ, մանկական հեծանիվն արժե 119 եվրո, ավելի մեծերինը`169-199 եվրո, էլեկտրաշարժիչով եւ ուժակուտակիչով  հեծանիվները` 699   եվրո:

Օգտագործված հեծանիվներ կարելի է ձեռք բերել մոտ հիսուն եվրոյով:

Մեծամասամբ էլեկտրաշարժիչներն օգտագործում  են բարձրադիր տեղանքը հաղթահարելու համար, եւ հիմնականում այն անձինք, որոնց խորհուրդ չի տրվում ֆիզիկական ջանք գործադրել:

Շատ հեծանիվներ ունեն փոխանցման տուփ, որը հնարավորություն է տալիս համեմատաբար հեշտ հաղթահարել կտրուկ վերելքները:

Գերմանական քաղաքների փողոցներում հաճախ կարելի է հանդիպել հեծանիվներով շրջող ընտանիքների:

Ավտոմեքենաների վարորդների օրինակելի կարգուկանոնը երաշխավորում է հեծանվորդների անվտանգությունը: Հեծանվորդներն էլ իրենց հերթին` մեծից փոքր, խստորեն պահպանում են երթեւեկության կանոնները: Նույնը վերաբերում է նաեւ հետիոտնին…

Եթե Բեռլինի քաղաքային տրանսպորտը ներկայացնենք միասնական համակարգով, ապա հեծանիվները դրանում ոչ պակաս կարեւոր դեր կունենան:

Հեծանիվների լայն կիրառությունը թույլ է տալիս զգալի կրճատել ճանապարհների գերծանրաբեռնվածությունը:

Գերմանիայի ընդհանուր ուղեւորափոխադրումներում հեծանվի մասնաբաժինը կազմում է 13%, այսինքն` մեկ տասներորդից ավելի: Հեծանիվ վարելը նաեւ հիանալի զբաղմունք է եւ ֆիզիկական մարզում:

Տասը տարի առաջ Բեռլինում հանդես եկան հեծանվային երթեւեկությունը զարգացնելու նախաձեռնությամբ: Պաշտոնապես ընդունվեց, որ հեծանիվը` որպես փոխադրամիջոց, ավտոմեքենաների ու հասարակական տրանսպորտի չափ կարեւոր է: Նորոգվեցին առկա հեծանվուղիները, ստեղծվեցին նորերը: Շատ ճանապարհներ ամբողջությամբ հատկացվեցին հեծանվորդներին, տեղադրվեցին համապատասխան նշաններ ու ցուցանակներ: Այժմ Բեռլինում հեծանվուղիների երկարությունը 620 կմ է:

Իսկ թե այս առումով ինչ վիճակում է մեր մայրաքաղաքը, հայտնի է բոլորին: Ընթացիկ տարում Երեւանի քաղաքապետարանը որոշել էր ուշադրություն հատկացնել տրանսպորտային միջոցի այդ տարբերակին, սակայն ամեն ինչ սահմանափակվեց ձեւական միջոցառումներով. հեծանվուղիների անորակ գծանշումներ… երեք կմ-ից էլ քիչ երկարությամբ:

Սմբատ Գրիգորյան