Երեւանի Կենտրոն եւ Նորք -Մարաշ վարչական շրջանների ընդհանուր իրավասության դատարանում՝ նախագահությամբ Մխիթար Պապոյանի, այսօր որոշում է կայացվել բերման ենթարկել  քաղաքագետ Սուրեն Սուրենյանցին:

«Փաստինֆո»-ի փոխանցմամբ, այսօր սույն գործով նախնական դատական նիստն էր, որին  Սուրենյանցը չէր ներկայացել, մեղադրող դատախազը միջնորդել է նրան բերման ենթարկել, տուժող Հեղինե Սարգսյանն էլ կարծիք է հայտնել,որ կցանկանար Սուրենյանցին տեսնել դատարանում:

Սուրենյանցը հայցելով դատարանի ներողամտությունը, դատարանի գրավոր տեղեկացրել էր, որ ինքը Հրազդանի Սուրբ Գրիգոր եկեղեցու բացման արարողության կազմակերպմանը  մասնակցում է  որպես լրագրող եւ խմբագիր՝ խնդրելով  նիստը հետաձգել, բացի այդ նա նաեւ նշել էր, որ իր շահերը պաշտպանող Կարապետ Գալստյանը գտնվում է արձակուրդում եւ կվերադառնա միայն օգոստոսի 26-ին:

Դատարանը հիմնավոր չի համարել Սուրենյանցի բացակայությունը եւ բերման ենթարկելու որոշում է կայացրել:

Ըստ մեղադրանքի՝ Ս. Սուրենյանցը 2012թ. հուլիսի 26-ին, հանդիպելով Հեղինե Սարգսյանին, նրանից  տեղեկացել է, որ վերջինս ցանկանում է որդուն՝ Ռաֆիկ Սարգսյանն  ընդունվի  Վ.Սարգսյանի անվան ռազմական կրթահամալիր։ Ինքն էլ Հ.Սարգսյանին վստահեցրել է, որ մեծ ծանոթություն ունի եւ որոշակի գումարի դիմաց այդ հարցում կարող է նրան օգնել, որին Հ.Սարգսյանը համաձայնել է։ 2012թ–ի հուլիսի 26-ից մինչեւ 2012թ-ի սեպտեմբերի 4-ն ընկած ժամանակահատվածում Ս. Սուրենյանցը հիշյալ պատրվակով Հ.Սարգսյանի վստահությունը չարաշահելու եւ խաբեության եղանակով նրանից մաս-մաս ստացել է խոշոր չափի ընդհանուր 530.000 ՀՀ դրամ գումար ու հափշտակել։

Ս. Սուրենյանցին մեղադրանք է առաջադրվել ՀՀ քրեական օրենսգրքի  178-րդ հոդվածի 2-րդ մասի 2-րդ կետով՝ խոշոր չափերով խարդախություն,խափանման միջոց ընտրվելով չհեռանալու մասին ստորագրությունը: 

Այս գործով հաջորդ դատական նիստը տեղի կունենա սեպտեմբերի 4-ին: