Օրերս Շրի Լանկայի Կանդի քաղաքում ոստիկանությունը կազմակերպել է շների զանգվածային հարսանեկան արարողություն, հայտնում է Agence France-Presse-ը: Ակցիան տեղի է ունեցել խուզարկու շներին բազմացնելու ծրագիրը զարգացնելու նպատակով: 

Ոստիկանությունն «ամուսնացրել է» շների ինը զույգ` սպիտակ կտորով եւ ծաղիկներով զարդարված փայտե բեմահարթակի վրա: Հանդիսությունն լիովին կրկնել է տեղական հարսանեկան ավանդույթը:  «Հարսնացուները» հագել են ձեռնոցներ, շալեր եւ գլխարկներ,  «փեսացուները»` նորաձեւ փողկապներ եւ պիջակներ: 

Հանդիսության հյուրերին եւ  բոլոր շներին թխվածքներ եւ բրնձի կաթ են հյուրասիրել: Շները «մեղրամիսը» կանցկացնեն Նուվար Էլիայի հանգստավայրում, հաղորդում է Lenta.ru-ն:

Շրի Լանկայի մշակույթի նախարարը հանդես է եկել  այս միջոցառման քննադատությամբ եւ բացատրություն է պահանջել:  Ոստիկանության մամուլի քարտուղար Բոուդիկա Սիրիվարդենան հայտնել է, որ դեպարտամենտը չի վիրավորել Շրի Լանկայի բնակչության զգացմունքները, որի 75 տոկոսը սինգալներ եւ բուդիստներ են, եւ ներողություն է խնդրել  նրանցից, ովքեր նման «հարսանիքը» վիրավորական են համարել: