Թայվանի նախագահի նստավայրին հունվարի 25-ի առավոտյան 35-տոննանոց բեռնատար է բախվել: 

Բեռնատարը ճեղքել է պարիսպը եւ փամփշտակայուն հատուկ էկրանը, բարձրացել մի քանի աստիճան  եւ կանգ առել միայն շենքի անմիջապես մուտքի առաջ, հայտնում է lenta.ru-ն` վկայակոչելով Agence France-Presse-ը:

Թայվանի նախագահ Մա Ինցզյուն միջադեպի պահին գրասենյակում չի եղել. Նա պաշտոնական այցով գտնվում է Աֆրիկայի երկրներից մեկում:

Միջադեպի հետեւանքով` ուժեղացվել են անվտանգության  միջոցները, հայտարարել է նախագահի մամուլի ծառայության ղեկավարը:

Հաղորդվում է, որ բեռնատարի վարորդը բախման հետեւանքով վերքեր է ստացել եւ տեղափոխվել հիվանդանոց: Հաղորդվում է, որ այդ մարդու ազգանունը Չանգ է, եւ նախկինում նա արդեն հայտնվել էր ոստիկանության տեսադաշտում: 

Ոստիկանության ոչ պաշտոնական աղբյուրները հայտնում են, որ Չանգը, ըստ նախնական վարկածի, հատուկ է այդ քայլին դիմել: Չանգն առայժմ հրաժարվում է պատասխանել քննիչների հարցերին: