նախընտրելի դարձնել
«Ոսկե ծիրան» կինոյի զարգացման հասարակական կազմակերպությունը Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի եւ ՀՀ Մշակույթի նախարարության հետ համագործակցությամբ՝ Հայոց ցեղասպանության հարյուրամյա տարելիցի առիթով մի շարք երկրներում կազմակերպում է թեմատիկ ֆիլմերի ցուցադրություններ: Ծրագրի շրջանակներում մարտի 13-ից 19-ը ցուցադրությունների կազմակերպվեցին Սոֆիայի 19-րդ միջազգային կինոփառատոնի շրջանակներում:
Սոֆիայի ծրագրի կազմակերպման գործընկերների թվում էր եւ մեծ աջակցություն է ցուցաբերել Բուլղարիայի Հանրապետությունում Հայաստանի Հանրապետության Դեսպանությունը:
Սոֆիայի միջազգային կինոփառատոնում Հայոց ցեղասպանության հարյուրամյակին նվիրված ծրագրում ընդգրկված էր երեք ֆիլմ՝ Հարություն Խաչատրյանի «Անվերջ փախուստ, հավերժ վերադարձը», Տավիանի եղբայրների «Արտույտների ագարակը» եւ Ֆաթիհ Աքինի «Սպի»-ն: Սոֆիայից զատ ցուցադրություններ կազմակերպվեցին նաեւ Բուլղարիայի Պլովդիվ եւ Վարնա քաղաքներում:
Փառատոնին ներկա է գտնվել եւ ծրագիրն ու ֆիլմերը ներկայացրել է ՀՀ Ժողովրդական արտիստ, կինոռեժիսոր, «Ոսկե ծիրան» կինոփառատոնի հիմնադիր տնօրեն Հարություն Խաչատրյանը:
«Այլեւս երբեք…» ծրագրի վերաբերյալ Հարություն Խաչատրյանը հարցազրույց է ունեցել Բուլղարիայի հանրային հեռուստաընկերությամբ եւ ներկայացրել Հայոց ցեղասպանության հարյուրերորդ տարելիցին նվիրված միջոցաումների մանրամասները:
«Ոսկե ծիրան» կինոփառատոնը 12 տարվա ընթացքում իր ուրույն տեղն է գրավել կինոփառատոների համաշխարհային քարտեզի վրա եւ ձեռք է բերել կարեւոր գործընկերներ: Մեծ ձեռքբերում է, որ Հայոց ցեղասպանության հարյուրերորդ տարելիցին նվիրված ծրագիրն իրականացվում է միջազգային կինոփառատոների շրջանակներում, ինչն էլ իր հերթին ընդլայնում է հանդիսատեսի շրջանակը:
Մեծ Եղեռնին նվիրված «Այլեւս երբեք…» կինոցուցադրությունների ծրագիրը հաջորդիվ ներկայացվելու է Ֆրանսիայի մայրաքաղաք Փարիզում:
Ֆրանսիայում անցկացվող Եվրոպա ֆիլմ ակտը Եվրոպայի կարեւորագույն կինոփառատոներից մեկն է: Այդ փառատոնի շրջանակներում եւս հայկական ֆիլմերի բովանդակ ծրագիր է ներկայացվելու: Հայոց ցեղասպանությանն անդրադարձող ֆիլմերից զատ կներկայացվեն նաեւ հայկական կինեմատոգրաֆի այլ նմուշներ:
