ՆախընտրելիՄոսկվայի շրջանի վերաքննիչ դատարանը դեկտեմբերի 21-ին անվճարունակ (սնանկ) է ճանաչել Չերկիզյան շուկայի նախկին սեփականատեր, ԱՍՏ խմբի հիմնադիր Թելման Իսմայիլովին, տեղեկացրել է դատարանի կայքը: Դատարանը քննել է Բորիս Զուբկովի հայցը Իսմայիլովի անհատական սնանկության մասին, որը քննության էր ընդունվել նոյեմբերի վերջին:
Բացի այդ, Իններորդ վերաքննիչ դատարանը հաստատել է Մոսկվայի Վերաքննիչ դատարանի որոշումը Իսմայիլովին պատկանող «ԿՖԲ ԱՍՏ» ԲԲԸ-ից, Մոսկվայի Բանկի օգտին 213,3 մլն դոլար գանձելու վերաբերյալ, տեղեկացնում է «Վեդոմոստին»:
Չերկիզյան շուկայի փակումից հետո ԱՍՏ խումբը վարկատուների եւ նախագծերի հետ կապված խնդիրներ ունեցավ: Այն 200 մլն դոլար է պարտք թուրք վարկատուներին եւ հյուրանոցի շինարարներին: Նոյեմբերին Իսմայիլովին պատկանող 5-աստղանի Mardan Palace հյուրանոցը Անթալիայում դատավճռի հարկադիր կատարման հետեւանքով բաժին հասավ Halk Bankası բանկին: Հյուրանոցը գնահատվել էր 719 մլն լիրա (մոտ 247 մլն դոլար),սակայն Halk Bankası-ն դրա համար կրկնակի էժան է վճարել` 360,5 մլն լիրա կամ մոտավորապես 124 մլն դոլար:
ՎՏԲ խումբը գրավ է վերցրել Արբատում գտնվող «Պրահա» ռեստորանը, Կրասնայա Պրեսնյայում գտնվող «Տրոպիկանա» բիզնես կենտրոնը եւ Իզմայիլովոյում ԱԿ-ն: ԱՍՏ-ի նախագահը պատմել է, որ ՎՏԲ-ն ուզում է այդ ակտիվները խլել 33 մլն դոլարի դիմաց, չնայած խումբը դրանք 250 մլն դոլար է գնահատում:
