նախընտրելի դարձնելԱրագածոտնի մարզի Ղազարավան գյուղի՝ քամու հասցրած վնասների դիմաց չփոխհատուցված բնակիչները բողոքում են, որ թեեւ մարզպետն իրենց հետ հանդիպելուց հետո խոստացել էր վերանայել վնասների չափը, բայց ոչ մի բան չի արվել:
«Եկել, նայել են մեկի տունը միայն, ում որ փոխհատուցել են: Չփոխհատուցված մարդկանց մոտ ոչ մեկ չի եկել, չի հետաքրքրվել, հույսները կորցրած նստել են մարդիկ»,- ասաց գյուղացիներից մեկը:
Հիշեցնենք, որ ուժեղ քամին նոյեմբերի 14–ին մեծ ավերածություններ էր գործել հանրապետության մի քանի մարզերում՝ այդ թվում Ղազարավանում: Գյուղացիների մեծ մասը մինչեւ այժմ չի փոխհատուցվել վնասների դիմաց: Ղազարավանի գյուղապետը մեզ հետ զրույցում ասել էր, որ ինքը 40 գյուղացու անուն է ներկայացրել, փոխհատուցում է եկել միայն դրանցից 6-ի համար: Գյուղացիները դիմել են մարզպետարան, որտեղից պատճառաբանել են, որ փոխհատուցվել են նրանք, որոնց շինությունների 80 տոկոսից ավելին վնասվել է: Հանդիպման ժամանակ մարզպետը խոստացել էր, որ խումբ կժամանի գյուղ եւ կվերանայվի վնասների ցանկը:
