Հայերի վրա Ալիեւը կրակեց` Հայաստանի ռազմավարական դաշնակցի կողմից տրամադրված զենքով: Այս մասին այսօր` ապրիլի 8-ին, լրագրողների հետ հանդիպմանն ասաց Քաղաքական եւ միջազգային հետազոտությունների կենտրոնի փոխտնօրեն, քաղաքագետ Ռուբեն Մեհրաբյանը` նշելով, որ դա փաստ է, որն արձանագրվեց նաեւ Հայաստանի նախագահի եւ վարչապետի կողմից:

«Ռուսական երկակի խաղը պետք  կասեցվի, Մոսկվան ամենաստոր խաղն է խաղում, ադրբեջանցիներին խրախուսում է, որ խախտեն համաձայնությունները, զենք է վաճառում Ադրբեջանին: Սա ռուս-ադրբեջանական դավադրություն էր  Հայաստանի դեմ»,-ասաց նա:

Նրա խոսքով,  ղարաբաղա-ադրբեջանական շփման գծում չորսօրյա պատերազմի ընթացքում, երբ Ալիեւին ստատուս-քվոն փոխելու ժամանակ էր տրված, բայց նրան չհաջողվեց` դիվանագիտական հարթակում նոր իրավիճակ ստեղծվեց` ԼՂՀ-ն ավելի քաշային կատեգորիա ստացավ, քան Ադրբեջանը:

«Դա ապացուցեց այն, որ համանախագահներն այցելելով Ստեփանակերտ` այցելում են պաշտպանության շտաբ, հանդիպումներ են ունենում Ղարաբաղի պաշտպանության բանակի ներկայացուցիչների հետ: Սակայն, չնայած դրան` հայկական դիվանագիտության առաջ նոր խնդիրներ են բացվել, որոնք ունեն կենսական կարեւորություն  հայ ժողովրդի, Հայոց պետականության համար: Հայ զինվորի կողմից գործած սխրանքը պետք է դիվանագիտական հարթության վրա ամրագրվի, հայկական կողմը պետք է հասնի նրան, որ ԼՂՀ եւ Ադրբեջանի շփման գծի վրա ստեղծվեն երաշխիքներ, որ նման հարձակում Ադրբեջանն այլեւս չի կարողանա գործել: ԼՂՀ բանակն ապացուցեց, որ տարածաշրջանում  անվտանգության եւ կայունության կարեւոր գործոն է, որի հետ հաշվի են նստում միջազգային հարթակներում»,-ասաց նա:

Ռուբեն Մեհրաբյանի խոսքով, Հայաստանը ոչ մի դեպքում չպետք է գնա նոր զինադադարի համաձայնագրերի ստորագրության` 1994թ. համաձայնագիրը լիովին բավարար է. «Սակայն, պետք  նշել նաեւ, որ այս համաձայնագիրը մի թերություն ունի` չի պարունակում իր մեջ պատասխանատվություն. պետք է երաշխիքներ, մեխանիզմներ, դիտորդների մանդատի փոփոխություններ լինեն, մոնիթորինգի  մշտական դիտարկումներ լինեն, որպեսզի, եթե  կողմը խախտի համաձայնագիրը` պատասխանատվության ենթարկվի:  Չկան այդ մեխանիզմները, դրա համար էլ Ալիեւն իրեն այդպես է պահում»,-ասաց նա: