Նախընտրելի
ՀՀԿ խմբակցության պատգամավոր Հայկ Բաբուխանյանի գլխավորած «Սահմանադրական իրավունք միությունը» նույնպես Գյումրիի ընտրություններում կպաշտպանի գործող քաղաքապետ Սամվել Բալասանյանի թեկնածությունը:
Այս առնչությամբ ՍԻՄ-ի տարածած հաղորդագրության մեջ նշվում է, որ այսօր կուսակցության կենտրոնական գրասենյակում տեղի է ունեցել նախագահության նիստ, որտեղ քննարկվել է Գյումրի քաղաքում տեղական ինքնակառավարման մարմինների ընտրություններում ՍԻՄ մասնակցության հարցը:
ՍԻՄ Շիրակի մարզային կառույցի ղեկավար Գագիկ Նիկողոսյանը ներկայացրել է կուսակցության մարզային կառույցի դիրքորոշումը, ըստ որի ՍԻՄ Շիրակի մարզային կառույցը ողջունում է Գյումրիի գործող քաղաքապետ Սամվել Բալասանյանի թեկնածության շուրջ դաշինքի ձեւավորումը:
Քննարկումների արդյունքում ՍԻՄ նախագահությունը որոշել է` Գյումրի քաղաքում քաղաքապետի եւ ավագանու առաջիկա ընտրություններին մասնակցել` որպես քաղաքապետի թեկնածու պաշտպանելով ՀՀԿ թեկնածու, գործող քաղաքապետ Սամվել Բալասանյանի թեկնածությունը` ընդգրկվելով Ս.Բալասանյանի շուրջ կազմավորվող քաղաքական դաշինքի կազմում: Միաժամանակ դաշինքի կազմում ակտիվորեն մասնակցել նախընտրական աշխատանքներին:
Նշենք, որ Գյումրիի քաղաքապետին սատարում է իշխող ՀՀԿ-ն, ՀԱԿ խմբակցության պատգամավորներ Խոսրով Հարությունյանի ՀՔԴՄ-ն եւ Արտաշես Գեղամյանի «Ազգային միաբանությունը»:
Սամվել Բալասանյանը ժամանակին եղել է ՕԵԿ անդամ, ապա անդամագրվել ԲՀԿ-ին, իսկ հիմա ՀՀԿ-ի թեկնածուն է, որին չի սատարում ԲՀԿ-ն:
