Եթե բանակին թույլ ես տալիս՝ հանցանք գործելու Քուրդիստանի դեմ, մի օր այդ բանակը գործելու է քո դեմ: Այդ մասին NEWS.am֊ին տված բացառիկ հարցազրույցում ասել է Թուրքիայի քրդական «Ժողովուրդների դեմոկրատական» կուսակցության պատգամավոր Կարո Փայլանը՝ անդրադառնալով նախօրեին ուշ երեկոյան Թուրքիայում տեղի ունեցած հեղաշրջման փորձին:

«Թուրքիան երբեք ժողովրդավարական պետություն չի եղել, մի քանի նմանատիպ հեղաշրջումներ են եղել, եւ պատճառն այն է, որ ժողովրդավարություն չկա այս երկրում: Անցած տարվա ընտրություններից հետո Էրդողանն իրականացրեց այդպես կոչված խորհրդարանական հեղաշրջում՝ բռնությամբ ստեղծելով խորհրդարանն ու ձեւավորելով Կառավարությունը: Եթե դու ուժ ես տալիս բանակին՝ հանցանք գործելու Քուրդիստանի դեմ, մի օր այդ զենքը քո դեմ է գործելու, հենց սա էլ տեղի ունեցավ այս գիշեր, երբ նրանք զենք օգտագործեցին Կառավարության, իշխանությունների դեմ»,- ասաց Կարո Փայլանը:

Ազգությամբ հայ պատգամավորը կարծում է, որ խորհրդարանական բոլոր ուժերը պետք է միավորվեն եւ պայքարեն երկրում ժողովրդավարությունը վերականգնելու համար: Ավելին, Փայլանը համոզված է, որ Թուրքիայում ժողովրդավարությունը բացակայում է, դա ապացուցում է նաեւ փաստը, որ երկրում հեղաշրջման փորձեր են իրականացվում:

«Նրանք, որոնք փորձում են հեղաշրջում անել, ժողովրդավարությունից հեռու են, նրանք իշխանություն են ուզում: Նույնը վերաբերում է Էրդողանին եւ կողմնակիցներին: Կուսակցությունները պետք է միավորվեն եւ միասին պայքարեն, որ երկրում հաստատվի ժողովրդավարությունը»,- ասաց նա:

Հիշեցնենք, որ հուլիսի 15-ի երեկոյան լրատվամիջոցները հաղորդել են Թուրքիայում ռազմական հեղաշրջման փորձի մասին: Անկարայի եւ Ստամբուլի փողոցներում ռազմական տեխնիկա է հայտնվել, տեղի են ունեցել կրակոցներ եւ պայթյուններ: Մի խումբ զինվորականներ հայտարարել են երկրում իշխանությունը վերցնելու մասին՝ սահմանադրական կարգը վերականգնելու, մարդու իրավունքներն ու ազատությունները ապահովելու նպատակով:

Վերջին տվյալներով շուրջ 200 մարդ է զոհվել, ձերբակալվել է մոտ 3 հազար մարդ: Թուրքական լրատվամիջոցների փոխանցմամբ, երկրում ռազմական հեղաշրջումը կազմակերպել է գնդապետ Մուհարեմ Քոսեն:

Թուրքիայի վարչապետ Բինալի Յըլդըրըմը հայտարարել է տեղի ունեցող իրադարձությունների անօրինական լինելու մասին: Նախագահ Ռեջեփ Թայիփ Էրդողանը հայտարարել է, որ հեղաշրջման փորձը ձախողվել է եւ ամբողջությամբ կճնշվի: