Երկու ամսվա ընթացքում պանդաների տասներեքերորդ զույգն է լույս աշխարհ եկել Չինաստանում  

Վերջին երկու ամսվա ընթացքում երկվորյակ պանդաների տասներեքերորդ զույգն է ծնվել Չինաստանում: Չենդու քաղաքում հսկայական պանդաների բազմացման կենտրոնի աշխատակիցները հայտնել են, որ օգոստոսի 12-ին տեղական ժամանակով 12.30-ին    179 գ կշռող արու եւ  89 գ կշռող էգ է լույս աշխարհ եկել: Նրանց ծնել է Յասին անունով պանդան, որը   2014-ին արդեն դարձել է երկվորյակ պանդաների մայրիկ:   

Սա երկվորյակ պանդաների արդեն իններորդ զույգն է, որը ծնվել է Չենդուի հսկայական պանդաների բազմացման կենտրոնում եւ տասներեքերորդն է ամբողջ Չինաստանում: Երկվորյակ պանդաների առաջին զույգը Չենդուի կենտրոնում ծնվել է հունիսի   20-ին:

Օգոստոսի 11-ին այդ նույն կենտրոնում Ցյաո Ցյաո անունով պանդան երկվորյակ է ծննդաբերել: Ձագերից մեկը    180,7 գ կշռող էգ է, երկրորդ նորածին պանդայի սեռը դեռ չեն որոշել: 

Սինհուա գործակալության տվյալներով, 2015-ի վերջին Չինաստանում վայրի բնության գրկում 1864 պանդա կար: Անցյալ տարի արգելոցներում պանդայի 43 ձագ է ծնվել , որոնցից 14-ը երկվորյակ զույգեր էին: