Գյումրիի Վարդանանց հրապարակում հուլիսի 9-ին կառապանի նկատմամբ  ոստիկանի մասնակցությամբ տեղի ունեցած ծեծի առթիվ հարուցված քրեական գործն  ուղարկվել է  ՀՀ հատուկ քննչական ծառայություն:

ՀՔԾ-ից NEWS.am-ին հայտնում են, որ նախապատրաստված նյութերով պարզվել է, որ  ոստիկանության Շիրակի մարզային վարչության օպեր լիազոր, ոստիկանության լեյտենանտ Գ. Ս.-ն, ալկոհոլի ազդեցությամբ Գյումրիի կենտրոնական հրապարակում կառապանից պահանջել է  կառքը հանձնել  իրեն: Ծագած վիճաբանության ընթացքում ոստիկանը ծեծի է ենթարկել  կառապանին: Միջադեպին մասնակցել է նաև անցորդներից մեկը, ում ոստիկանը ևս  հարվածներ է հասցրել:

Փաստի առթիվ Շիրակի մարզի դատախազի հանձնարարությամբ ՀՀ քրեական օրենսգրքի 118-րդ հոդվածի հատկանիշներով հարուցվել է քրեական գործ, որի նախաքննությունը հանձնարարվել է ՀՔԾ-ին:

Ավելի վաղ NEWS.am-ը հայտնել էր, որ ՀՀ ոստիկանապետ Վլադիմիր Գասպարյանի հանձնարարությամբ ներքին անվտանգության վարչությունում ծառայողական քննություն է սկսվել, ոստիկանության աշխատակիցը ազատվել է պաշտոնից: