Երեկ «Առավոտ»-ում հրապարակված «Ոստիկանին գայթակղել են «Գոլդ» համարները» հոդվածի կապակցությամբ ՀՀ ոստիկանապետ Ալիկ Սարգսյանի հանձնարականով նշանակվել է ծառայողական քնություն. այն կատարում են Ոստիկանության շտաբն ու ներքին անվտանգության վարչությունը:

Մինչ այս կառույցները ոստիկանապետին կներկայացնեն ծառայողական քննության վերջնական արդյունքները, թերթին հայտնի է դարձել, որ Ոստիկանության Կոտայքի մարզային քննչական բաժնի պետ, փոխգնդապետ Վալենտին Պապյանը երեկ արդեն ԳԱԶ 21 մակնիշի ավտոմեքենայի սեփականատեր Ալբերտ Լեւոնյանին է վերադարձրել 08 SS 005 ավտոմեքենայի համարանիշները, որոնք քննչականի պետը տեղադրել էր իր վարած «Տոյոտա-Պռադո» մակնիշի «ջիպ»-ի վրա: Քննչականի պետը վերադարձրել է նաեւ «Տոյոտա-Պռադոն» իր ընկերոջը, քանի որ «պարզվել է», որ հիշյալ ավտոմեքենան իբր իրենը չէ:

«Առավոտ»-ի հրապարակումից հետո ՀՀ ոստիկանապետի անմիջական հանձնարարականի արդյունքում իրավապահ պաշտոնյայի կողմից խախտված երեւույթը «շողուլի» բերվեց: Իսկ արդյոք պաշտոնյան կենթարկվի՞ վարչական պատասխանատվության, քանի որ ՀՀ վարչական իրավախախտումների մասին օրենքի 123 պրիմ հոդվածի 4-րդ եւ 5-րդ կետերով օրինախախտը տուգանվում է 100 հազար դրամով:

Լուսանկարը` Գագիկ Շամշյանի