Թուրքերն անընդհատ հայտարարում են Սիրիայի քրդական անկլավներ զորք մտցնելու ցանկության մասին, որոնք ընդամենը չորս են: Այդ մասին NEWS.am-ի թղթակցի հետ զրույցում հայտնել է Ռուսաստանի Գիտությունների ակադեմիայի Համաշխարհային տնտեսության եւ միջազգային հարաբերությունների ինստիտուտի գիտաշխատող, քաղաքագետ, թուրքագետ Վիկտոր Նադեին Ռաեւսկին:

Նրա խոսքով՝ Անկարան դեռեւս սահմանափակվում է այդ անկլավներն հրթիռակոծելով եւ առաջ շարժվել չի համարձակվում: «Բայց նրանք անընդհատ հայտարարում են Սիրիայի հյուսիս-արեւմուտք՝ Աֆրին զորքերը  մտցնելու իրենց ցանկության մասին։ Այժմ այնտեղ է գտնվում  ռուսական ռազմական ոստիկանությունը, որը վերահսկում է հրադադարի որոշման կատարումը»,-պարզաբանել է փորձագետը` հավելելով, որ ամեն անգամ պետք է  հակահարված տալ թուրքերին՝ ճնշելով նրանց  արկածները։ Սակայն այդ արկածներից Անկարան դեռեւս ամբողջությամբ չի հրաժարվել։

Միեւնույն ժամանակ, թուրքագետը նշել է, որ Անկարան ինչպես միշտ գործելու է այնպես, ինչպես իրեն շահավետ է: «Ճիշտ է, նրանք լավ հասկանում են, որ այնտեղ  կարող են բախվել ռուսական ռազմական ուժերին», - ավելացրել  է  քաղաքագետը: Վիկտոր ՆադեինՌաեւսկին համոզմունք  է  հայտնել, որ եթե թուրքերին հաջողվի զբաղեցնել Սիրիայի  ինչ-որ շրջաններ, ապա նրանք անպայման այնտեղ զտումներ կիրականացնեն։