նախընտրելի դարձնելԳերմանիայի Քրիստոնեա-դեմոկրատական միություն/Քրիստոնեա-սոցիալական միություն (ՔԴՄ/ՔՍՄ) պահպանողական դաշինքի եւ Գերմանիայի սոցիալ-դեմոկրատական կուսակցության (ԳՍԴԿ) միջեւ նախնական բանակցություններն ընթանում են կառուցողական մթնոլորտում։ Այս մասին հայտնել է ԳՍԴԿ առաջնորդ Մարտին Շուլցը, հաղորդում է ՏԱՍՍ-ը։
«Երեկ այն ընթացավ կառուցողական մթնոլորտում։ Հուսով ենք, որ այսօր ամեն ինչ կշարունակվի նույն ոգով»,-ասել է նա:
Նրա խոսքով՝ այսօրվա խորհրդակցությունները նվիրված կլինեն եվրոպական քաղաքականությանը: «Հուսով եմ, որ մենք կհասնենք արդյունքի, որը Գերմանիային թույլ կտա դառնալ Եվրամիության շարժիչը»,-ավելացրել է Շուլցը:
Սոցիալ-դեմոկրատների եւ պահպանողականների միջեւ նախնական բանակցությունները մեկնարկել են կիրակի: Ժամանակացույցի համաձայն՝ բանակցությունները կշարունակվեն հինգ օր եւ կավարտվեն հունվարի 12-ի գիշերը: Ուրբաթ օրը կողմերը մտադիր են եզրափակիչ հայտարարություն ընդունել։
Գերմանիայում խորհրդարանական ընտրությունները անցկացվել են 2017 թվականի սեպտեմբերի 24-ին։ ՔԴՄ/ՔՍՄ դաշինքը ստացել է ձայների 32,9 տոկոսը, իսկ ԳՍԴԿ-ն իր պատմության մեջ ամենավատ արդյունքն է դրսեւորել՝ հավաքելով ընդամենը ձայների 20 տոկոսը։ «Գերմանիայի համար այլընտրանք» աջ կուսակցությունը հավաքել է ձայների 12.6 տոկոսը, Ազատ դեմոկրատական կուսակցությունը՝ 10.7 տոկոսը, կանաչները՝ 8.9 տոկոսը, իսկ ձախ կուսակցությունը` 9.2 տոկոսը:
Գերմանիայի նոր կառավարությունը դեռ չի ձեւավորվել։ Սկզբում պահպանողականնները բանակցություններ էին վարում կանաչների ու լիբերալների հետ, բայց այդ բանակցությունները փակուղի էին մտել։ Դրանից հետո որոշում էր կայացվել բանակցությունների մեջ մտել ԳՍԴԿ-ի հետ։
